ഒരു ന്യൂ ഇയർ വരവേല്പ് ഓർമ്മ

ചില കാര്യങ്ങൾ  ആ സംഭവത്തിന്റെ പ്രാധാന്യത്തേക്കാൾ അതുമായി ബന്ധപ്പെട്ട വ്യക്തിയുടേ സവിശേഷത കൊണ്ട് എന്നും ഒളിമങ്ങാതെ മായാതെ നമ്മെ ജിവിതാന്ത്യം വരെ വിടാതെ പിന്തുടരും..അത്തരത്തിലൊരു പഴയ ഒരു ഓർമ്മ  ഇവിടെ പങ്ക് വെക്കട്ടെ..

പത്തിരുപത്തിമൂന്ന് വർഷം മുന്നെയുള്ള  ഒരു ഡിസംബർ 31  .പുതുവർഷതലേന്ന് ഞങ്ങൾ കൂട്ടുകാരെല്ലാം കൂടി സൈദുക്കാടെ  പീടിക (പലചരക്ക് കട) പരിസരത്ത് സൈദുക്ക രാത്രി കട പൂട്ടിപോയതിനു ശേഷം ഒത്ത് കൂടാൻ ഐക്യ കണ്ഢേന ഒരു തീരുമാനമായി.

---------------------------------------------------------------------------------------------------------------

സൈദുക്കാടെ പീടികകോലായിലെ ബെഞ്ചിനും സൈഡിലെ തിണ്ണയ്ക്കുമെല്ലാം ഞങ്ങളുടെ അക്കാലത്തെ കൂട്ടുകൂടലിന്റെയും ബഹളങ്ങളുടെയും പാരവെപ്പിന്റെയും പല പദ്ധതി ആസൂത്രണങ്ങളുടെയും മാത്രമല്ല സംഘടനാ പ്രവർത്തനങ്ങളുടെ കൂടി നിരവധി കഥകൾ പറയാനുണ്ടാവും. ഇന്ന് കട പ്രവർത്തിക്കുന്നില്ലെങ്കിലും കെട്ടിടം അങ്ങിനെ തന്നെ നില നിൽക്കുന്നു. അധിക കാ‍ലം ഈ നില്പ് തുടരാൻ അതിനാവില്ലെങ്കിലും.

-------------------------------------------------------------------------------------------------------------

സൈദുക്ക നാട്ടിൽ അറിയപ്പെട്ട ഒരു വ്യക്തിത്വമായിരുന്നു..മുന്നെ  ബസ് ഡ്രൈവർ ആയിരുന്നതിനാൽ ‘ഡ്രൈവർ സൈദുക്ക‘ എന്ന് പറഞ്ഞാൽ ആർക്കും പെട്ടെന്ന് മനസിലാവും...ഞങ്ങൾ. തൊഴിയൂരിലുള്ള മൂത്തുമ്മാടെ വീട്ടിലേക്ക് പോവുമ്പോൾ സൈദുക്ക ഓടിച്ചിരുന്ന ബസിൽ (white way എന്നായിരുന്നു ബസിന്റെ പേരു് ) പലവട്ടം യാത്ര ചെയ്തിട്ടുണ്ട്. ബസ് ഓടിക്കുന്ന ഡ്രൈവർ നമ്മളോട് സംസാരിക്കുക എന്നത് ഒരു അഭിമാനമല്ലേJ അതിനാൽ ഞാൻ മുൻ സീറ്റിൽ തന്നെ സ്ഥലം പിടിക്കും. എന്നോട്  അദ്ദേഹം ആ വളയവും ഗീയറും ഹോണും എല്ലാം കൈകാര്യം ചെയ്യുന്നതിനിടയിൽ സംസാരിക്കും. ഞാൻ അത്ഭുതപൂർവ്വം നോക്കിയിരിക്കും.. പിന്നീട് ബസ് ഡ്രൈവർ ജോലി ഉപേക്ഷിച്ച് അദ്ദേഹം സ്വന്തം അമ്പാസഡർ കാറ് (ടാക്സി) ഓടിച്ചിരുന്നു. എനിക്ക് ഡ്രൈവിംഗ് ലൈസൻസ് കിട്ടി പ്രാക്ടീസിനു കയറിയത് സൈദുക്കാടെ കാറിലായിരുന്നു. കുറച്ച് മുൻശുണ്ടിക്കാരനായിരുന്നത് കൊണ്ട് ചീത്ത കുറച്ച് കേട്ടിട്ടുണ്ട്.. മൂപ്പർക്ക് എല്ലാ കുണ്ടിലും കുഴിയിലും ചാടിച്ച് ഓടിക്കാം.. എനിക്കൊരു കല്ല്ലിന്മേൽ കയറ്റാൻ പാടില്ല. ഒരിക്കൽ അതിരാവിലെയുള്ളപതിവ് പ്രാക്ടീസ് സവാരിക്കിടയിൽ റോഡിൽ കണ്ട ഒരു  പരന്ന കല്ലിനെ കവർ ചെയ്ത് ഞാൻ സ്റ്റിയറിംഗൊന്ന് കറക്കിയൊടിച്ചു... ഒരു ശബ്ദം വണ്ടിക്കടിയിൽ നിന്ന്  കേട്ടു.എന്റെ ധൈര്യം കൊണ്ടോ എന്തോ പിന്നെ വണ്ടി നീങ്ങുന്നില്ല അത് മിണ്ടാതായി . ഇന്ന് തല്ലുറപ്പായി എന്ന് ഞാൻ കരുതി പക്ഷേ അന്നദ്ധേഹം ഒന്നും പറഞ്ഞില്ല. വണ്ടിയിൽ നിന്നിറങ്ങി പരിശോധിച്ച് വന്ന് പടച്ചോൻ കാത്തു..ഇന്നിനി നീ വണ്ടി ഓടിക്കണ്ടാ എന്ന് മാത്രം പറഞ്ഞ് അവസാനിപ്പിച്ചു...റോഡിൽ ഞാൻ കണ്ടത് ഒരു  കല്ലായിരുന്നില്ല ഒരു നല്ല ഒരു പനംകുറ്റിയായിരുന്നു.. (ടാറിടാത്ത പഞ്ചായത്ത് റോഡ് സൈഡിൽ ഉണ്ടായിരുന്ന ഒരു പന മുറിച്ചതിന്റെ ബാക്കി പത്രം.അതെങ്ങിനെ റോഡിൽ എത്തി എന്ന് ഇന്നും ആലോചിച്ചിട്ട് മനാസിലായിട്ടില്ല.:( ) .. നാട്ടിൽ എല്ലാവർക്കും സുപരിചിതനായ സൈദുക്ക ഞങ്ങളുടെ സംഘടനാ പ്രവർത്തനങ്ങളോട് ആദ്യം എതിർചേരിയിൽ നിന്നിരുന്നുവെങ്കിലും കാര്യങ്ങൾ മനസിലാക്കി പിന്നീട് സഹകരിച്ചിരുന്നു.. ആരെയും കൂസാത്ത ഒരു വ്യക്തിത്വമായിരുന്നുവെങ്കിലും ഉള്ളിൽ സ്നേഹമുള്ള മനുഷ്യനായിരുന്നു സൈദുക്ക എന്ന് അടുത്തിടപഴകാൻ അവസരം കിട്ടിയപ്പോൾ മനസിലാക്കാൻ സാധിച്ചു.

-------------------------------------------------------------------------------------------------------------

കട പൂട്ടുന്നതിനു മുന്നെ തന്നെ ചിലരൊക്കെ പീടികതിണ്ണയിലും ബെഞ്ചിലുമായി ആസനമുറപ്പിച്ച് തുടങ്ങിയിരുന്നു. സൈദുക്കാക്ക് ഈ സന്നാഹങ്ങൾ കണ്ട് സംശയം തോന്നാതിരുന്നില്ല എന്ന് മാത്രമല്ല ‘ഇന്നെന്താടാ‍ എല്ലാവരും കൂടെ വല്ല വിക്രസും ഒപ്പിക്കാനുള്ള പരിപാടിയുണ്ടോ ? എന്ന് ചോദിക്കയും ചെയ്തു.  ഏയ് ഞങ്ങളാ ടൈപ്പല്ല എന്ന് മറുപടിയും കൊടുത്തു. സൈദുക്ക കട പൂട്ടി തൊട്ടടുത്തു തന്നെയുള്ള വീട്ടിലേക്ക് പോയതോടെ ചറുങ്ങും പിറുങ്ങും അടക്കം  നല്ല ഒരു ഓഡിയൻസ് ഞങ്ങളുടെ പരിപാടി വീക്ഷിക്കാൻ എത്തിയിട്ടുണ്ട്.. ന്യൂ ഇയർ വരവേല്പ് എന്നാൽ പ്രത്യേകം അജണ്ടയൊന്നുമില്ല. ഉറക്കം കളഞ്ഞ് ഒത്ത് കൂടുക ബഹളം വെച്ച് പരിസരവാസികളെ വെറുപ്പിക്കുക .ഇത്രേ ഉള്ളൂ. അന്ന് പീടികയുടെ തൊട്ടടുത്തുള്ളത് ചേക്കു മുസ്‌ലിയാരുടെ വീടും റസാഖ്ക്കാടെ വീടും ആയിരുന്നു. (ഇന്ന് ആ വീടുകൾക്ക് പരിസരത്തായി എന്റെ പുതിയവീടടക്കം  നിരവധി വീടുകൾ ഉയർന്നു. )
ഞാനും സൈദുക്കാടെ മകൻ കമറുവും ആണു പരിപാടി നിയന്ത്രിക്കുന്നത് (എന്ത് നിയന്ത്രണം !!) പിന്നെ ഖാദറും,ഷെരീഖും പിന്നെ കാരേങ്ങൽ റസാഖ് കൂടാതെ റഷീദ് & റസാ‍ഖ്  തുടങ്ങി മിക്ക മഹാന്മാരും ഹാജർ.. പീടികകോലായിൽ കിടന്നിരുന്ന വലിയ തകര വീപ്പ മുറ്റത്തേക്ക് ഉരുട്ടി കൊണ്ട് വന്ന് തലകുത്തനെ നിർത്തി.. ചീമ കൊന്ന വടി വെട്ടി ഡ്രം അടി ചെറിയ തോതിൽ ആരംഭിച്ചു... പാട്ട് ,പ്രസംഗം ,മിമിക്രി, മോണോ ആക്ട് ,കഥാപ്രസംഗം. വായിൽ തോന്നിയത് കോതക്ക് പാട്ട് എന്ന തോതിൽ പരിപാടികൾ നടക്കുന്നു.. ചറുങ്ങും പിറുങ്ങുമെല്ലാം കുറച്ച് കഴിഞ്ഞപ്പോൾ സ്ഥലം കാലിയാക്കി, അവരുടെ ഉമ്മമാരും ഉപ്പമാരും വലിച്ച് കൊണ്ടു പോയി എന്ന് പറയാം.. പിന്നെ ഞങ്ങൾ കുറച്ച് പേർ ബാക്കിയായി. കടയുടെ അടുത്ത് തന്നെയാണ് ചേക്കു മുസ്‌ലിയാരുടെ വീട് അവിടെയുള്ളവർക്ക് ഈ പരിപാടിയുടെ കഠോരത ശരിക്കും അനുഭവിക്കാം. “ഈ ചെക്കന്മാർക്ക്  വേറെ പണിയൊന്നുമില്ലെന്ന്“ ചോദിച്ച് കൊണ്ട് ഐസുകുട്ടിത്ത  വേലി വരെ വന്ന് നോക്കി.. പിന്നെ വീട്ടിലേക്ക്  വലിഞ്ഞു. പരിസരം വിജനമാണ്.. രാത്രിയുടെ ഇരുട്ട് കനത്തു. വഴിവിളക്കൊന്നും ഇല്ലാത്തതിലാൽ ഞങ്ങൾ നിൽക്കുന്ന പരിസരം ഒഴിച്ച് എങ്ങും ഇരുട്ട് മാത്രം  

അങ്ങിനെ സമയം രാത്രി 12 മണിയാവുന്നു.. ഡ്രം താളം മുറുകുന്നു.. കർണ്ണ കഠോരമായ ഗാനങ്ങൾ തകർക്കുന്നു.  പെട്ടെന്ന്  വേലിക്കരുകിൽ നിന്ന് ഒരു അനക്കം ..വെളുത്ത  ഒരു രൂപം ഞങ്ങളെ തന്നെ വീക്ഷിച്ച് നിൽക്കുന്നു..  എല്ലാവരും താനേ സൈലന്റ് മോഡിലായി ..ഡ്രം അടി നിന്നു.. പാട്ടുകൾ നിലച്ചു..ആരാണീ പാതി രാത്രിയിൽ ? കള്ളന്മാർ കറുത്ത വസ്ത്രമല്ലേ ധരിക്കുക.. ഇനി വല്ല ജിന്നോ മറ്റോ ആവുമോ ? പല വിധ ചിന്തകൾ പലരിലൂടെയും കടന്ന് പോയി. എല്ലാവരും ആ നില്പ് നിൽക്കയാണ്.. ഞങ്ങൾ ഒന്നും ഉരിയാടാതെ അനങ്ങാതെ നിൽക്കുന്നത് കണ്ടത് കൊണ്ടാവാം  ആ രൂപത്തിനനക്കമുണ്ടായി.. ഇരുട്ടിൽ നിന്ന് വെളിച്ചത്തിലേക്ക് നീങ്ങി നിന്നു..  അപ്പോഴാണ് എല്ലാവരുടെയും ശ്വാസം നെരെയായത്. .ഞങ്ങളുടെ ബഹളം കാരണം ഉറങ്ങാൻ പറ്റാതെ തൊട്ടടുത്ത വീട്ടിൽ നിന്ന് ചേക്കു മുസ്‌ലിയാർ ഇറങ്ങി ഞങ്ങളോട് ഇതൊന്ന് നിർത്താൻ പറയാൻ വേണ്ടി വന്നതായിരുന്നു. എന്നിട്ട്. ആരൊക്കെ എന്തൊക്കെ ചെയ്യുന്നു എന്ന് സസൂക്ഷ്മം വീക്ഷിക്കയായിരുന്നു. ‘മനുഷ്യനെ കിടന്നുറങ്ങാൻ സമ്മതിക്കില്ലേ ..നിങ്ങൾക്ക് വേറെ പണിയൊന്നുമില്ല.  എന്നൊക്കെയുള്ള ശകാരം പ്രതീക്ഷിച്ച് അതേറ്റു വാങ്ങാൻ തയ്യാറായി നിന്ന ഞങ്ങളെ നോക്കി ചേക്കു മുസ്‌ലിയാർ ചോദിച്ചു..  "എന്തേ നിർത്തീത് ? നിർത്തണ്ട.. എനിക്കവിടെ കിടന്നിട്ട് ശരിക്ക് കേൾക്കാൻ പറ്റണില്ല. ഒന്നും അങ്ങട് ക്ലിയറാവുന്നില്ല.. അതോണ്ട് ഇവടെ വന്ന് നിന്നതാ..! .. ഒന്ന് മനസിലാവുന്ന രീതിയിൽ ആയ്ക്കോട്ടെ."  ഇതും പറഞ്ഞ് അദ്ദേഹം വീട്ടിലേക്ക് തന്നെ തിരിച്ച് പോയി..  പിന്നെ പാട്ടും ബഹളവും പുനരാരംഭിച്ചില്ല. എല്ലാവരും ചമ്മിയ മോന്തകൊണ്ട് പരസ്പരം നോക്കി.. പിന്നെ അവിടെ ചിരിയോ ചിരിയായിരുന്നു. ഒരു പക്ഷെ ഞങ്ങളോട്  ദേശ്യപ്പെട്ടിരുന്നെങ്കിൽ ഞങ്ങൾ പരിപാടി വീണ്ടും തുടരുമായിരുന്നേനേ.. പ്രായം അതാണല്ലോ. എന്നാൽ തന്റെ സ്വതസിന്തമായ ശൈലിയിൽ പുഞ്ചിരിച്ച് തന്റെ എല്ലാ നീരസവും ഉള്ളിലൊതുക്കി വളരെ കൂളായി ഞങ്ങളെ മൊത്തം ഒന്നുമല്ലാതെയാക്കി  ആ പരിപാടി ശല്യം നിർത്തിച്ച ആ സമീപന രീതി. ഇന്നും ഞാനോർക്കുന്നു. ആർക്കും അത് മറക്കാനാവുകയില്ല.

ജീവിതത്തിലെ എല്ലാ പ്രതിസന്ധിഘട്ടങ്ങളെയും പുഞ്ചിരിയോടെ നേരിട്ട് കൊണ്ട് എല്ലാവരെയും സ്നേഹിച്ച് ജീവിച്ച “ഒരു എളിയ വലിയ മനുഷ്യൻ“ അതായിരുന്നു ചേക്കു മുസ്‌ലിയാർ. സന്ദർഭത്തിനനുസരിച്ച് തമാശ പറയാനും തമാശയിലൂടെ കാര്യം അവതരിപ്പിക്കാനുമുള്ള കഴിവ് അതൊന്ന് വേറെതന്നെയായിരുന്നു. തൊഴിയൂർക്കാരായിരുന്ന ഞങ്ങൾ വെള്ളറക്കാടുകാരായി മാറാനുള്ള വഴി തുറന്നത് അദ്ദേഹത്തിലൂടെയായിരുന്നു. എന്റെ ഉപ്പാടെ അടുത്ത സുഹൃത്തായിരുന്ന പ്രിയ ചേക്കുമുസ്‌ലിയാരെ കുറിച്ച് വിശദമായി ഒരു കുറിപ്പ് എഴുതാം പിന്നീട്. ഇൻശാ അല്ലാഹ്..  

ഇന്ന് സൈദുക്കയും   ചേക്കു മുസ്‌ലിയാരും  ഓർമ്മകൾ മാത്രമായി അവശേഷിക്കപ്പെട്ട് ..വെള്ളറക്കാട് ജുമുഅത്ത് പള്ളി ഖബർസ്ഥാനിൽ അന്ത്യ വിശ്രമം കൊള്ളുന്നു. ഇരുവരുടെയും ഖബറിടം  വെളിച്ചമേകി ,തെറ്റുകൾ പൊറുക്കപ്പെട്ട് സ്വർഗം  നൽകി അനുഗ്രഹിക്കണമേയെന്ന പ്രാർഥനയോടെ ഒരു  വർഷം കൂടി കാല യവനികക്കുള്ളിൽ മറയുന്ന വേളയിൽ, ജീവിതമെന്ന മരത്തിലെ ആയുസിന്റെ ഒരില പൊഴിച്ച് ,ഖബറിലേക്കുള്ള ദുരം കുറയുന്ന സത്യം മറക്കാതിരിക്കാം നമുക്ക്..   നന്മയുടെ സന്തോഷത്തിന്റെ സമാധാനത്തിൻ ഒരു വർഷം എല്ലാവർക്കും ആശംസിച്ച് ..സസ്നേഹം         

പ്രവാസിയും മാറാരോഗവും !

ഹലോ..  !
ഹലോ....

അസ്സലാമു അലൈക്കും..

വ അലൈക്കുമുസ്സലാം..

ഈദ് മുബാറക്…

ഈദ് മുബാറക്…

എന്താ ഇന്നലെ വിളിച്ചില്ലല്ലോ.. പെരുന്നാളൊക്കയായിട്ട്

അതിനു നിങ്ങൾക്കിന്നലെ നോമ്പായിരുന്നില്ലേ.. ഇന്നല്ലേ പെരുന്നാള് .!!

അതല്ല ..നിങ്ങൾക്കിന്നലെയായിരുന്നല്ലൊ ഒന്നാം പെരുന്നാള്..  വിളിച്ചിരുന്നെങ്കി ഒരു ഈദ് മുബാറക് പറയാരുന്നു..

ഹേ….!  അത്  കൊള്ളാലോ.. ഞങ്ങൾക്ക് ഇന്നലെ പെരുന്നാളായതിനാൽ ഞങ്ങൾ അങ്ങോട്ട് വിളിക്കണം.. എന്നിട്ട് നിങ്ങൾ ഇങ്ങോട്ട് ആംശസിക്കണം..  !! ഹാപ്പി ബർത്ഡേ റ്റു മീ…   എന്നാ ശരി. .. ഇനി അടുത്ത പെരുന്നാളിനു ശ്രദ്ധിച്ചോളാം..  വെക്കട്ടേ..    മാ‌സലാമ....!

പ്രവാസിയുടെ ഒരോ കടമകൾ..!


വാൽ നുറുങ്ങ് :പ്രവാസത്തിന്റെ പ്രയാസങ്ങളും പരിഭവങ്ങളും പറയുകയെന്നത് പ്രവാസികൾക്കൊരു മാറാ രോഗമാണ്.. അതെല്ലാം നിങ്ങൾ ഒരു ചെവി കൊണ്ട് കേട്ട് മറുചെവിയിലൂടെ പുറത്തേക്ക് വിടുക.. ഒന്നും മനസിൽ വെക്കരുതേ ..അപേക്ഷയാണ്..

ബലി പെരുന്നാൾ ചിന്തകൾ

"ലബ്ബയ്ക്കല്ലാഹുമ്മ ലബ്ബൈക്,

 ലബ്ബൈക്കലാ ശരീഖ ലക ലബ്ബൈക് ..

  “ ക‌അബത്തിൽ വന്ന് ഹജ്ജ് ചെയ്യാനുള്ള  വിളംബരത്തിനു പ്രത്യുത്തരം ചെയ്ത്  ലോകത്തിന്റെ നാനാ ഭാഗത്തു നിന്നും വിശ്വാസികൾ ലോകരക്ഷിതാവിന്റെ കല്പന കൈകൊണ്ട് അവന്റെ ദൂതരുടെ വാക്കുകൾ ശിരസാ വഹിച്ച് മനസാലും തടീയായാലും ധനത്താലും പരിപൂർണ്ണനായി നിർവഹിക്കേണ്ട മഹത്തായ ആരാധനാ കർമ്മം  നിർവഹിച്ച് കൊണ്ടിരിക്കുന്നു. വിവിധ ഭാഷകളുടെ, ദേശങ്ങളുടെ ,സംസ്കാരങ്ങളുടെ ,ജീവിത രീതികളുടെയെല്ലാം ഏകോപനം..   മബ്‌റൂർ (സംശുദ്ധം ) ആയ, മഖ്‌ബൂൽ (സ്വീകാര്യമായ) ആയ ഹജ്ജിനു സ്വർഗമല്ലാതെ പ്രതിഫലമില്ല എന്ന് പ്രഖ്യാപിക്കപ്പെട്ട മഹനീയ കർമ്മത്തിനായി പുറപ്പെട്ട എല്ലാ ഹാജിമാർക്കും സ്വീകാര്യമായ,സംശുദ്ധമായ ഹജ്ജ് കർമ്മം നിർവഹിക്കാൻ കഴിയട്ടെ.  അതിലൂടെ സ്വയം ഉത്കൃഷ്ടനാവുകയും തന്റെ ശിഷ്ട ജീവിതത്തിൽ അതിന്റെ വിശുദ്ധി നഷ്ടപ്പെടാതെ  തന്റെ കുടുംബത്തിനും , സമൂഹത്തിനും മാതൃകയായി ജീവിക്കാനും അവർക്ക് കഴിയണം. സ്വീകാര്യമായ ഹജ്ജിന്റെ അനുരണനങ്ങൾ അപ്രകാരമായിരിക്കുമെന്ന് മഹാന്മാർ നമ്മെ പഠിപ്പിക്കുന്നു..

ഇന്ന് കേവലം ലോകമാന്യത്തിനു വേണ്ടി കർമ്മങ്ങൾ ചെയ്യുന്നവർ അധികരിച്ചിരിക്കുന്നു, അതിനാൽ തന്നെ ഓരോ ആരാധന കർമ്മങ്ങൾ കൊണ്ട് ഉദ്ദേശിക്കപ്പെട്ട ഫലം സ്വയമോ മറ്റുള്ളവർക്കോ ലഭിക്കാതെയും പോകുന്നു.      ഹജ്ജ് പെരുന്നാൽ അഥവാ ബലിപെരുന്നാൽ വിശ്വാസികളുടെ മനസിൽ ആഹ്‌ളാദം നിറച്ച് വീണ്ടും വന്നണയുന്നു. ഖലീലുള്ളാഹി ഇബ്‌റാഹിം നബി (അ) യുടെ ത്യാഗത്തിന്റെയും  സമർപ്പണത്തിന്റെയും ഓർമ്മകൾ നിറയട്ടെ നമ്മുടെ മനസിൽ.. ഹാജറ ബീവി(റ)യുടെ ആത്മ വിശ്വാസത്തിന്റെയും ,ധൈര്യത്തിന്റെയും ,ധീരഗാഥകളാൽ നിറയട്ടെ നമ്മുടെ ഹൃദയങ്ങൾ.     ഇസ്‌ലാമിന്റെ എല്ലാ ആഘോഷങ്ങൾക്കും ആരാധനയൂടെ രക്ഷാ കവചങ്ങളുണ്ട്.. അത് മറി കടന്ന്കൊണ്ടുള്ള ആർഭാടങ്ങളിലേക്കും അനാചാരങ്ങളിലേക്കും തിരിയുന്നത് വിശ്വാസത്തിനു മാത്രമല്ല സമൂഹത്തിനും നന്മയല്ല എന്ന് മനസിലാക്കാൻ കഴിയട്ടെ നമുക്കേവർക്കും.  

നാം സന്തോഷിക്കുന്ന വേളയിൽ നമ്മുടെ സഹോദരങ്ങളും അയൽ‌വാസികളും നമ്മുടെ സന്തോഷത്തിന്റെ ഭാഗമാവേണ്ടതുണ്ട്.. അത് ഉറപ്പ് വരുത്താനുള്ള ബാധ്യത നാം മറന്ന് കൂടാ.. ഒറ്റപ്പെടലുകളും വേർതിരിവുകളുമല്ല മറിച്ച് കൂട്ടായ്മയും സാഹോദര്യവുമാണ് ആഘോഷങ്ങളിലൂടെ ഉരുത്തിരിയേണ്ടത്.  പ്രിയപ്പെട്ടവരെ അകലങ്ങളിൽ വിട്ട് ഈ  ഊഷരഭൂമിയിൽ സമ്മേളിച്ചിരിക്കുന്ന സന്താപങ്ങളുടെ സങ്കലനങ്ങളിലും സ്നേഹതീരങ്ങൾ പണിയുന്ന നാം ആ സ്നേഹ പാശത്തിന്റെ ഒരറ്റം നമ്മുടെ ജന്മനാടിന്റെ മുക്കിലും മൂലയിലുമെത്തിക്കാൻ അതിലൂടെ അതിരുകളില്ലാത്ത ഒരു സ്നേഹ സാമ്രാജ്യം കെട്ടിപ്പടുക്കാൻ ശ്രമിക്കുന്നവരാണ്. അതാണു പ്രവാസിയുടെ ജീവിതവും ആഘോഷവും എല്ലാം..

 ‘സഹോദരന്റെ മുഖത്ത് നോക്കി പുഞ്ചിരിക്കുന്നത് ധർമ്മമാണെന്ന് " പഠിപ്പിച്ച ലോക ഗുരു മുഹമ്മദ് നബി(സ.അ) യുടെ മൊഴിമുത്തുകൾ ഉൾകൊണ്ട് പകയുടെ പുകമറ നീക്കി സേഹത്തിന്റെ വെള്ളി വെളിച്ചം പരത്താൻ നമ്മുടെ മനസുകൾ വിശാലമാവട്ടെ..  ക്ഷണികമായ ജീവിത ചക്രത്തിന്റെ തിരിച്ചിലിനിടയിൽ മാറി മറിഞ്ഞ് വരുന്ന ഋതുക്കളുടെ രൂപ ഭാവ മാറ്റങ്ങൾ.. .. "മനുഷ്യൻ അവന്റെ കരങ്ങളാൽ പ്രവർത്തിച്ചതിന്റെ ഫലമായി" ഭൂമിയിൽ അവനു ദുരന്തങ്ങൾ സൂചനകളായി ഭവിക്കുന്നത് കണ്മുന്നിൽ ഗോചരമാവുമ്പോഴും ഉറക്കത്തിലാണധികമർത്യരും .. കാരുണ്യത്തിന്റെ കരവുമായി സമീപിക്കുന്നവർ തന്നെ അധികാരത്തിന്റെ അധീശത്വം സ്ഥാപിക്കാനായി അന്തകന്റെ വേഷവുമണിയുന്നു.  ദുരന്തഭൂമിയെ സ്വയം സൃഷ്ടിച്ച് കൊണ്ട് സമാധാനം എന്നത് മരീചീകയാക്കി മാറ്റി മനുഷ്യൻ ..

"കൊല്ലുന്നവനറിയുകയില്ല ഞാനെന്തിനു കൊല്ലുന്നു വെന്ന് കൊല്ലപ്പെട്ടവനറിയുന്നില്ല ഞാനെന്തിനു കൊല്ലപ്പെട്ടു വെന്ന്" , തിരുനബി(സ.അ) പ്രവചിച്ച കാലത്തിലൂടെ നാം കടന്ന് പോയികൊണ്ടിരിക്കുന്നു എന്ന യാഥാർഥ്യം തിരിച്ചറിയുന്നവർ എത്ര ?   ദിനരാത്രങ്ങളുടെ മാറ്റം മറിച്ചിലുകൾക്കിടയിൽ വന്ന് ചേരുന്ന ആഘോഷങ്ങളും ഇന്ന് വെറും കച്ചവടചരക്കാക്കി മാറ്റി നമ്മൾ എങ്കിലും പ്രതീക്ഷകൾ കൈ വിടാതെ നമുക്ക് ഒന്നായി ഒത്തു ചേർന്ന്  നാഥനെ പ്രകീർത്തിക്കാം..   സ്നേഹവും സഹിഷ്ണുതയും സാഹോദര്യവും ഊട്ടിയുറപ്പിക്കാനുതകുന്നതാക്കട്ടെ എല്ലാ ആഘോഷങ്ങളും  .!

പഴയ ഒരു പോസ്റ്റ് താഴെ  കോപ്പി ചെയ്യുന്നു (ബലി പെരുന്നാൾ സ്നേഹ സന്ദേശം)


ശറഫുറ്റ ദുല്‍-ഹജ്ജ്‌ മാസം പിറന്നു..
ലക്ഷോപലക്ഷങ്ങള്‍ ലബ്ബൈക്ക ചൊല്ലി.!
ഈദുല്‍ അദ്‌-ഹാ തന്‍ ശോഭ പരന്നു..
ഈണത്തില്‍ രാക്കിളി തക്‌ബീറു പാടി!


എല്ലാമറിയുന്ന ഏകന്‍ ഇലാഹി.
എല്ലാ സ്തുതിയും നിനക്കാണു നാഥാ
നിന്നെ മറന്നുള്ള ആഘോഷമില്ലാ..
നിന്നെ സ്തുതിക്കാതെ ആനന്ദമില്ലാ!

ആലംഭഹീനരെ ഓര്‍ക്കേണം നമ്മള്‍.
ആശ്രയമെത്തിച്ചു നേടേണം പുണ്യം
മുത്ത്‌ നബിയുടെ സന്മാര്‍ഗപാത
പിന്തുടര്‍ന്നവര്‍ക്കാണു വിജയം

ഈദുല്‍ അദ്‌ ഹാ തന്‍ സന്ദേശ ഗീതം
സത്യ സമാധാന തൗഹീദിന്‍ ഈണം
അല്ലാഹ്‌ അക്‌ബര്‍ അല്ലാഹ്‌ അക്‌ബര്‍
‍അല്ലാഹു അക്‌ബര്‍ വലില്ലാഹില്‍ ഹംദ്‌..


ശാന്തി നിറയട്ടെ കേരള നാട്ടില്‍
‍ശാന്തി നിറയട്ടെ ഭാരത ഭൂവില്‍
‍ശാന്തി നിറയട്ടെ അറബിപ്പൊന്‍ നാട്ടില്‍
‍ശാന്തി നിറയട്ടെ ഈ ലോകമെങ്ങും.

ഈദ്‌ മുബാറക്‌.. ഈദ്‌ മുബാറക്‌
ഈദ്‌ മുബാറക്‌ നേരുന്നിതേവം

..ത്യാഗത്തിന്റെയും സഹനത്തിന്റെയും ഓര്‍മ്മകളുണര്‍ത്തി ഒരു ബലി പെരുന്നാള്‍ കൂടി..
ഏവര്‍ക്കും ശാന്തി നിറഞ്ഞ നന്മ നിറഞ്ഞ ഈദുല്‍-അദ്‌-ഹാ ആശംസകള്‍..