Monday, March 22, 2010

മോൾക്ക് 10, എനിയ്ക്ക് 16


ഫ്ലാഷ് ബാക്ക്


വളരെ ചെറുപ്പത്തിൽ എന്ന് വെച്ചാൽ ഈ മലയാളം ബ്ലോഗിംഗ് ജനിക്കുന്നതിനും വളാരെ മുമ്പ്, ഞാൻ സ്വന്തമായി കഠിനാദ്ധ്വാനം ചെയ്ത് പരസഹായം കൂടാതെ വളരെ ചിലവ് കുറഞ്ഞ രീതിയിൽ നിർമ്മിച്ച എന്റെ സ്വന്തം വീട്ടിൽ ഞാൻ ഒറ്റയ്ക്ക് താമസമാക്കിയിരുന്ന (അസൂയ പാടില്ല. അദ്ധ്വാനിക്കണം ! ) ഒരു അവധിക്കാല ദിവസം ..


ഏറെ നേരമായിട്ടും അന്നത്തെ വീട്ടുകാരി(വെറുതെ ഒരു ഭാര്യ)യെകാണാതെ അന്വേഷിച്ചിറങ്ങിയതായിരുന്നു ഞാൻ. സ്വന്തം ഇരു ചക്ര വാഹനത്തിൽ തന്നെ (അസൂയക്കാർ വീണ്ടും ക്ഷമിക്കുക !)യായിരുന്നു യാത്ര. കുറെ നേരമലഞ്ഞിട്ടും അന്ന് ഒരാളെ കിട്ടാത്തതിനാൽ അടുത്തുള്ള പറമ്പുകളിലെ പറങ്കിമാവിൻ കൊമ്പിൽ വരെ തിരക്കി തിരിച്ചെത്തിയ ഞാൻ ജീവിതത്തിൽ ആദ്യമായി ഇടിവെട്ടിയവനെ പാമ്പ് കടിച്ച സമയത്ത് തേങ്ങ തലയിൽ വീണാ‍ലുള്ള അവസ്ഥ മനസ്സിലാക്കി. !

എന്റെ വീടിന്റെ കഴുക്കോലുകൾ ഊരിപ്പിടിച്ച് കൊണ്ട് ഉമ്മയും എന്റെ സ്വന്തം പെങ്ങന്മാ‍രും നടന്നകലുന്നു. ‘നീ വീട്ടിലേക്ക് വാ’ എന്ന ഒരു ക്ഷണം (ഉമ്മാടെ ) അതിന്റെ ഭവിഷ്യത്ത് മനസ്സിലായതിനാൽ ഞാൻ നിരസിക്കുകയായിരുന്നു. ആട്ടിൻ കൂട്ടിൽ അവറ്റകൾക്ക് നിൽക്കാൻ/കിടക്കാനും വേണ്ടി ഇട്ടിരുന്ന കവുങ്ങിൻ പാളികൾ കൊണ്ട് മേൽ‌പ്പുര മേഞ്ഞ് വീടിന്റെ നിർമ്മാണം എങ്ങിനെ ചിലവ് ചുരുങ്ങിയ നിലയിൽ ആക്കാം എന്ന എന്റെ ഗവേഷണം പൊളിച്ചത് അന്നും എന്റെ പെങ്ങന്മാരായിരുന്നു (ഇതിനു മുന്നെയും എന്നിലെ കലാകാരനെ ഇവർ ഒറ്റു കൊടുത്തിരുന്നു !! )എന്ന സത്യം ഞാൻ മനസ്സിലാക്കി. എന്നും പെങ്ങന്മാർ ആങ്ങളമാർക്ക് പാരയാണല്ലോ..മുരളിയ്ക്ക് പദ്മജയെന്ന പോലെ !! അവർക്ക് വേണ്ടെങ്കിൽ എനിക്കും വേണ്ട..ആർക്ക് ചേതം ! ഞാൻ ആ ശ്രമം ഉപേക്ഷിച്ചു.
........

ആർക്ക് വേണ്ടിയും കാത്ത് നിൽക്കാതെ കാലം കടന്നു പോയി... ഒപ്പം ബാല്യവും കൌമാരവും കൈവിട്ട് പോയെങ്കിലും, എല്ലാം കാലമാവുന്ന നിത്യസത്യത്തിന്റെ യവനികക്കുള്ളിലേക്ക് പിൻ‌വലിഞ്ഞെങ്കിലും, കളിവീടുകൾ കാണാകാഴ്ചകളായിമാറിയെങ്കിലും , മധുരിക്കുന്ന ചിലപ്പോഴെങ്കിലും നൊമ്പരപ്പെടുത്തുന്നതുമായ ഓർമ്മകളിൽ ഇടയ്ക്കെങ്കിലും ലയിക്കാൻ മനസെന്നും കൊതിക്കുന്നു. .


മോൾക്ക് 10




ജീവിതയാനം തട്ടിയും മുട്ടിയും നീങ്ങുകയും ഇടയ്ക്ക് ചില തുരുത്തുകളിൽ അല്പം വിശ്രമിക്കയും ചെയ്ത് മുന്നോട്ട് പ്രയാണം തുടരുന്നതിനിടയിൽ വെറുതെയല്ലാതെ ഒരു ഭാര്യയും കൂടെ കൂടി 1996 നവംബർ 7 ന് ..പിന്നെ ഞങ്ങളുടെ അഥവാ ഞാൻ എന്ന സുന്ദരന്റെയും എന്റെ അത്രതന്നെ സൌന്ദര്യമില്ലാത്തെ (അവൾ ഈ ബ്ലോഗ് വായിക്കില്ലെന്ന ഉറപ്പിൽ)എന്റെ സ്വന്തം ബീവിയുടെയും ദാമ്പത്യ വല്ലരിയിൽ ആദ്യ പുഷ്പവും (2000 മാർച്ച് 22 ന് )വിരിഞ്ഞു. ഇന്ന് 2010 മാർച്ച് 22 സഫമോൾക്ക് 10 വയസ് തികയുന്നു.(ഹിജ്‌റ വർഷ പ്രകാരം കഴിഞ്ഞ ദുൽ-ഹജ്ജ്‌ 16 ന്‌ പത്ത്‌ വയസ്‌ തികഞ്ഞു) കളിവീടിനു പകരം എതൊരാളുടെയും സ്വപനമായ ഒരു വീടും ജഗന്നിയന്താവായ അല്ലാഹുവിന്റെ അനുഗ്രഹത്താൽ പണി പൂർത്തിയാക്കി കഴിഞ്ഞ തവണ നാട്ടിൽ പോയവപ്പോൾ ഗൃഹപ്രവേഷവും നടത്തുകയും ചെയ്തു.



എനിയ്ക്ക് 16



എന്തെങ്കിലും ജോലി കിട്ടുമെങ്കിൽ നാട്ടിൽ നിൽക്കുന്നതായിരിക്കും നല്ലതെന്ന എന്റെ ഉപ്പാടെ ( ഉപ്പാടെ അനുഭവത്തിൽ നിന്ന് ) ഉപദേശം ദഹിക്കാതെ ഞാനീ യു.എ.ഇ യിൽ എത്തിയിട്ട് 2010 മാർച്ച് 23 ന് 16 വർഷം തികയുന്നു. (ആദ്യയാത്ര സൌദിയിലേക്കായിരുന്നു. 1992 ൽ അവിടെ കേവലം 8 മാസമാണുണ്ടായിരുന്നത്. സൌദി ജീ‍വിതം ഒരു പാട് അനുഭവങ്ങൾ സമ്മാനിച്ചു. ഒരെണ്ണം ഈദുൽ ഫിത്വറിന്റെ കണ്ണുനീർ’ വായിക്കാം). ഇപ്പോൾ തിരിഞ്ഞും തിരിയാതെയും നോക്കുമ്പോൾ (ബാർബർഷോപ്പിലെ കസേരയിലിരിക്കുമ്പോൾ പ്രത്യേകിച്ചും ) ശ്യൂന്യതയാണ്.. അത് ശ്യൂന്യതയല്ല കഷണ്ടിയുടെ തിളക്കമാണെന്ന് ചിലർ (അസൂയക്കാർക്ക് ഗൾഫിലും !!). പഴയ ഫോട്ടോ പ്രൊഫൈലിൽ ഇട്ടിട്ടു കാര്യമില്ലാതായിരിക്കുന്നു. ഒരു അനോണി പ്രൊഫൈൽ പോലും ഇല്ലാത്ത ഏറെ പ്രവാസികൾക്കിടയിൽ സ്വന്തമായി സ്വന്തം പ്രൊഫൈൽ ഉണ്ടെന്ന ആശ്വാസമുണ്ട്..

സ്നേഹമയിയായ ജീവിതസഖിയും കുറുമ്പിന്റെ കൂമ്പാരമായ പൊന്നുമോളും ...പിന്നെ എന്നെ ഞാനാക്കിയ എന്റെ മാതാപിതാക്കളും.. ഇണക്കവും പിണക്കവുമായി സഹോദരങ്ങളും .. എല്ലാവരും കണ്ണെത്താ ദുരത്താണെങ്കിലും ഖൽബുകൾ കോർക്കപ്പെട്ടു കഴിയുന്നു. പ്രതീക്ഷകളോടെ തന്നെ മുന്നോട്ട് നീക്കുന്നു നാളുകൾ.. ! ശുഭ പ്രതീക്ഷകളിലാണല്ലോ ജീവിതം


പിന്നെ, ഞാൻ എന്നെ പറ്റി സുന്ദരൻ എന്ന് പറഞ്ഞത് സയം പുകഴ്ത്തിയതാ‍ണെന്ന് തോന്നുന്നുണ്ടോ ? എന്നാൽ ഇവിടെയിതാ ‘കിണ്ടാപ്പിപ്പശു‘വിന്റെ (ഒരു സാങ്കല്പിക നാമം) ചിത്രം വരച്ച് അതിനു താഴെ സഫ എന്നെഴുതി കൊടുത്തയച്ചതിന് മറുപടിയായി ‘ഉപ്പാടെ ചിത്രം വരച്ച് അയക്കുന്നു. എന്നോട് കളിക്കരുതെന്ന’ ഉപദേശത്തോടെ സഫമോൾ അയച്ച് തന്നെത് നോക്കൂ.


എന്നാലും ഇത്രയ്ക്ക് സുന്ദരനാണോ ഞാൻ !!




യു.എ.ഇയിൽ 16 വർഷം തികയുന്ന എനിക്ക് ഞാൻ തന്നെ നേരുന്നു.. അൽ-ആശംസകൾ (അറബിയിൽ അങ്ങിനെയാ..അൽ കൂട്ടണം ) എന്നെ 16 വർഷം സഹിച്ച യു.എ.ഇ യിലെ നിവാസികൾക്ക് ഏറെ നന്ദി.





സഫമോൾ(വലത്ത്) ,ഹാദിമോൻ &ഹിദമോൾ (അനുജന്റെ മക്കൾ) (കഴിഞ്ഞ തവണ നാട്ടിൽ പോയപ്പോൾ അനുജന്റെ ഭാര്യാവീട്ടിൽ വെച്ച് എടുത്തത് )


സഫമോൾക്ക് ഈ പൊന്നുപ്പാടെയും പൊന്നുമ്മാടെയും പൊന്നുമ്മകളോടെ ജന്മദിനാശംസകൾ.. നിങ്ങളും നേരുമല്ലോ !

37 comments:

ബഷീർ said...

മകൾക്ക് 10 എനിയ്ക്ക് 16.

ശുഭ പ്രതീക്ഷകളോടെ തുടരുന്നു.

Rasheed Chalil said...

ജന്മദിനാശംസകള്‍... :)

jayanEvoor said...

ഹൃദയം നിറഞ്ഞ ആശംസകൾ!

പത്തു വയസ്സുകാരിക്കും, 16 കാരനും!!

കുഞ്ഞു കുഞ്ഞു സന്തൊഷങ്ങളിലൂടെയും നൊമ്പരങ്ങളിലൂടെയും ഉയർന്ന് സഫ മോൾ മാതാപിതാക്കൾക്ക് അഭിമാനമായി വളരട്ടെ!

മുസ്തഫ|musthapha said...

ഹൃദയം നിറഞ്ഞ ആശംസകള്‍...
സഫ മോള്‍ക്കും ഉപ്പാക്കും... :)
സഫമോള്‍ ഉപ്പാനെക്കാളൂം നന്നാക്കിയാണല്ലോ ഉപ്പാനെ വരച്ച് വെച്ചിരിക്കുന്നത് :)

ഓടോ: അല്ലെങ്കിലും ഈ മാര്‍ച്ച് മാസം ആരാ മോള്... ഓളൊരു മൊഞ്ചത്തിയല്ലേ :)

അഭി said...

ജന്മദിനാശംസകള്‍... :)

ശ്രീ said...

ആശംസകള്‍ ബഷീര്‍ക്കാ (ഗള്‍ഫിലല്ലാത്തതിനാല്‍ 'അല്‍' ചേര്‍ക്കുന്നില്ല)

സഫമോള്‍ക്ക് ഒരു സ്പെഷ്യല്‍ പിറന്നാള്‍ ആശംസകളും കൂടെ... ഒപ്പം ഉപ്പയെ പടമാക്കിയതിന് അഭിനന്ദനങ്ങളും (ഹോ... എത്ര കൃത്യമായി വരച്ചു) :)

Unknown said...

ഹൃദയം നിറഞ്ഞ പിറന്നാള്‍ ആശംസകൾ!

"അളളാഹു അനുഗ്രഹിക്കട്ടെ"

കുരുത്തം കെട്ടവന്‍ said...

best wishes for ever.

വല്യമ്മായി said...

ആശംസകള്‍ രണ്ടാള്‍ക്കും.

പക്ഷെ എഴുത്തില്‍ വല്ലാത്ത കൃത്രിമത്വം ഫീല്‍ ചെയ്തു :)

ശ്രദ്ധേയന്‍ | shradheyan said...

ഹൃദയം നിറഞ്ഞ ആശംസകള്‍

ബഷീർ said...

> ഇത്തിരിവെട്ടം

ആശംസകൾ ഹൃദയപൂർവ്വം സ്വീകരിച്ചിരിക്കുന്നു. സന്തോഷം ഇവിടെ വന്നതിൽ


> jayanEvoor,

ആശംസകൾക്കും നല്ല വാക്കുകൾക്കും നന്ദി

സന്തോഷം കമന്റ്റിയതിൽ :)


> മുസ്തഫ,

ആശംസകൾ സ്വീകരിച്ചിരിക്കുന്നു സന്തോഷത്തോടെ

നിങ്ങളാ രഹസ്യം വെളിപ്പെടുത്തി :)

എല്ലാ മാസവും മൊഞ്ചത്തികൾ തന്നെ :)

ഓ.ടോ. അഗ്രജനിൽ നിന്ന് മുസ്തഫയിലേക്ക് ! ഇനി എന്നാ തിരിച്ച് ?


> അഭി

സന്തോഷപൂർവ്വം സ്വീകരിച്ചിരിക്കുന്നു :)



> ശ്രീ,

വേണ്ട..അൽ ചേർക്കണമെന്നില്ല. :)
കിട്ടി ബോധിച്ചു

ശ്രീ.സത്യങ്ങൾ ഇങ്ങിനെ പരസ്യമായി പറയാമോ ?

ബഷീർ said...

> haris

ആശംസകൾക്ക് നന്ദി..പ്രാർത്ഥനകൾ സ്വീകരികുമാറാകട്ടെ. സന്തോഷം ഇവിടെ വന്നതിൽ


> കുരുത്തം കെട്ടവൻ

ആശംസകൾക്ക് നന്ദി..
(എന്നാലും ആ പേര് വിളിക്കാൻ ഒരു ഇത് :)


> വല്ല്യമ്മായി

ഇവിടെ വന്നതിലും ആശംസകൾ നേർന്നതിലും വളരെ സന്തോഷം.

ഞാൻ ഒന്ന് കൂടി വായിച്ച് നോക്കി താങ്കളുടെ അഭിപ്രായം കണ്ടിട്ട്. എന്റെ എഴുത്തിന്റെ കുഴപ്പമാവാം.കൂടുതൽ ശ്രദ്ധിയ്ക്കാം. വളരെ നന്ദി. അഭിപ്രായം അറിയിച്ചതിന്

ശ്രീനന്ദ said...

പിറന്നാള്‍ ആശംസകള്‍, ഉപ്പക്കും മോള്‍ക്കും.

ഹംസ said...

ഹൃദയം നിറഞ്ഞ ആശംസകള്‍…

സഫമോള്‍ എത്ര കൃത്യമായി ഉപ്പാടെ പടം വരച്ചു.. അവള്‍ക്ക് എന്‍റെ സ്പെഷല്‍ ആശംസകള്‍

ബഷീർ said...

> ശ്രദ്ധേയൻ ,

ഹൃദയ പൂർവ്വം സ്വികരിച്ചിരിക്കുന്നു. :)

> ശ്രീനന്ദ ,

ആശംസകൾക്ക് വളരെ നന്ദി..
ഇവിടെ വന്നതിൽ സന്തോഷം

> ഹംസ ,

ആശംസകൾ സ്വീകരിച്ചിരിക്കുന്നു.

പടം ഇഷ്ടമായല്ലോ :) സഫമോൾക്കുള്ള സ്പെഷ്യൽ ആശംസകളും അറിയിക്കാം

Sidheek Thozhiyoor said...

സഫമോള്‍ക്ക് മൂത്താപ്പാടെ ഹൃദയം നിറഞ്ഞ ആശംസകള്‍..
ബാപ്പാക്ക് പിന്നെ തരാം..!

Unknown said...

മോള്‍ക്ക്‌ പിറന്നാള്‍ ആശംസകള്‍, സര്‍വൈശ്വര്യങ്ങളും ഉണ്ടാവട്ടെ.

ഉപ്പയ്ക്ക് ആശംസകളില്ല‍, വെറും 16 അല്ലെ ആയോള്ളൂ ഇവിടെ 19 ആയി !

OAB/ഒഎബി said...

അതല്ല ബഷീറേ..വീട് പണിയില്‍ മറ്റു പണികളൊക്കെ മറന്ന് പോയൊ?

മോള്‍ക്ക് ആശംസകള്‍..


20ആം ബഷീറിന്റെ മുന്നിലെ 16ആം ബഷീര്‍ വെറും അല്‍-പരിഹാസന്‍!അതിനാല്‍ ആശംസകള്‍ക്ക് കാലമായില്ല.

OAB/ഒഎബി said...

ഒന്ന് മറന്നു: ചിത്രം വരച്ച് വരച്ച് സഫ മോള്‍ ഒഎബിയെ പോലെ ? വലിയ ചിത്രകാരിയാവട്ടെ
:)

പടച്ചതമ്പുരാന്‍ എല്ലാവര്‍ക്കും നല്ലത് മാത്രം വരുത്തട്ടെ, ആമീന്‍.

പള്ളിക്കുളം.. said...

അൽ ആശംസ വൽ പ്രാർഥനകൾ..

K C G said...

സഫമോള്‍ക്ക് അല്‍-ജന്മദിനാശംസകള്‍
16കാരന് അല്‍-ആശംസകള്‍.

പറഞ്ഞപോലെ ബീവീനേക്കാളും മൊഞ്ചുണ്ടല്ലോ ആ 16കാരന്!

thoufi | തൗഫി said...

സഫമോള്‍ക്ക് ഹൃദയം നിറഞ്ഞ ആശംസകള്‍

വാഴക്കോടന്‍ ‍// vazhakodan said...

ഹൃദയം നിറഞ്ഞ ആശംസകള്‍!

പത്തു വയസ്സുകാരിക്കും, 16 കാരനും!!

എനിക്ക് ശരിക്കും 27 ആയി :)(ആരോടും പറയണ്ട,വിശ്വസിച്ച് കളയും)

ബഷീർ said...

> സിദ്ധീഖ് തൊഴിയൂർ,

സഫമോൾക്ക് മൂത്താപ്പാടെ ആശംസ ഇന്നലെ തന്നെ പാർസലായി വിട്ടു. എനിക്കുള്ളത് ഡ്രാഫ്റ്റായിട്ട് അയച്ചാൽ മതി :)


> തെച്ചിക്കോടൻ,


ആശംസകൾ കൈമാറുന്നു. നന്ദി
ഒരു ചെറിയ ആശംസ തന്നൂടെ ഈ 16 കാരനും.. എന്നാൽ തിരിച്ചങ്ങോട്ട് ഒരു 19 ആശംസകൾ നേരുന്നു :)


> OAB/ഒഎബി,

ആശംസകൾക്ക് നന്ദി

എന്ത് പണി ? ഞാൻ ആ ടൈപ്പല്ല :)
മറന്നതൊന്നുമല്ല ബഷീർക്കാ..!!

പിന്നെ താങ്കളുടെ മുന്നിൽ വരുമ്പോൾ അൽ-ചമ്മൽ തോന്നുന്നു ..

@തെച്ചിക്കോടൻ ,ഇതാ താങ്കളെ കടത്തിവെട്ടി ഒരാൾ 20 ന്റെ നിറവിൽ.. ഇനി ആരാ !



> പള്ളീക്കുളം,

ഹ..ഹ. അതെനിക്കിഷ്ടായി..
എല്ലാം വരവ് വെച്ചിരിക്കുന്നു.


> ഗീത,

ഗീതേച്ചിയുടെ ആശംസകൾ സഫമോൾക്ക് കൈമാറുന്നു.
എനിക്കുള്ളത് വരവ് വെച്ചു.

ഓ..ചേച്ചിയെങ്കിലും മനസ്സിലാക്കിയല്ലോ..മതി..:)

ബഷീർ said...

> മിന്നാമിനുങ്ങ്, ,

ഇവിടെ എത്തിയതിലും ആശംസകൾ നേർന്നതിലും വളരെ സന്തോഷം.


> വാഴക്കോടൻ ,


ആശംസകൾ വരവ് വെച്ചിരിക്കുന്നു.

നിങ്ങൾ പറാഞ്ഞാൽ പിന്നെ വിശ്വസിക്കാതിരിക്കാൻ വയ്യ..

5 എന്നെഴുതുമ്പോൾ ഇപ്പോഴും 2 ആയി മാറുകായാണല്ലേ !

എറക്കാടൻ / Erakkadan said...

ഈ പതിനാറു നമ്മുക്കൊന്നു അവസാനിപ്പിക്കണ്ടേ...മോളു പക്ഷെ വളരട്ടെ.....

വിജയലക്ഷ്മി said...

uae yil 16th pirannaal aaghoshatthiinodoppam "Saha molkku snehamniranja 10th jenmmadinaashamsakal !! " ariyikkumallo?
sorry ivideyetthaan oru divasam vaikippoyi.

ബഷീർ said...

> എറക്കാടൻ,

അവസാനിപ്പിക്കണം. അവസാനിപ്പിക്കണം..
എന്ന് കഴിയും എന്നാണു ചിന്ത.


> വിജയലക്ഷ്മി ചേച്ചി

ആശംസകൾ സഫമോളെ അറിയിക്കും
എല്ലാ ആശംസകൾക്കും നന്ദി
വൈകിയിട്ടില്ല.ഇനി വൈകി വന്നാലും സന്തോഷം

ബിന്ദു കെ പി said...

ഹൃദയം നിറഞ്ഞ ആശംസകൾ; വൈകിയാണെങ്കിലും.....

Typist | എഴുത്തുകാരി said...

ഇത്തിരി വൈകി അല്ലേ?

സഫ മോള്‍ക്കു് പിറന്നാള്‍ അല്ല, അല്‍ ആശംസകള്‍.

സന്തോഷകരമായ ജീവിതം ആശംസിക്കുന്നു, പ്രാര്‍ത്ഥിക്കുന്നു.

ഗൗരിനാഥന്‍ said...

ദീര്‍ഘായ്യുസ്സായിരിക്കട്ടെ..സമാധാനം അവളോടും, താങ്കളുടെ കുടുംബത്തോടും കൂടെ എന്നുമുണ്ടാകട്ടെ..

പ്രവീണ്‍ വട്ടപ്പറമ്പത്ത് said...

പഠിക്കുന്ന സമയത്ത് ഏറ്റവും വലിയ ലക്ഷ്യം പ്രവാസിയാവുക എന്നതായിരുന്നു .. അന്നത്തെ പ്രായത്തിൽ കാശുണ്ടാക്കാൻ ഏറ്റവും എളുപ്പമുള്ള പരിപാടി അതാണല്ലോ..നല്ലതിനാണോ ചീത്തക്കാണോ എന്നറിയില്ല. നാട്ടിൽതന്നെ ജോലികിട്ടി..പക്ഷെ ഒന്നുറപ്പാ, പ്രവാസിയാവാൻ മിനിമം കുറച്ച് മനക്കരുത്തൊക്കെ വേണം.. എന്നെക്കൊണ്ടൊന്നും ആ പരിപാടി പറ്റില്ലാ.. :)
മകൾക്കും വാപ്പക്കും എന്റെ വക ആശംസകളും പ്രാർത്ഥനകളും..

( O M R ) said...

വൈകിയില്ലെന്ന് കരുതട്ടെ,
സുഖവും നന്മയും നേരുന്നു..
www.oyemmar.blogspot.com

ബഷീർ said...

> ബിന്ദു.കെ.പി ,

> എഴുത്തുകാരി ,

> ഗൌരിനാഥൻ ,

> പ്രവീൺ വട്ടമ്പറമ്പത്ത് ,

> OMR ,


വന്നതിലും വായിച്ചതിലും ആശംസകൾ നേർന്നതിലും വളരെ സന്തോഷം.

@ പ്രവീൺ,

നാട്ടിൽ ജോലികിട്ടുന്നത് അവിടെ കഴിയാൻ പറ്റുന്നതും വളരെ നല്ല കാര്യം തന്നെ. വേരുകൾ അറുക്കപ്പെടുന്ന പ്രവാസം കൊണ്ട് എന്ത് നേടാൻ കഴിഞാലും എന്നും തേങ്ങലുകളും നൊമ്പരങ്ങളും ബാക്കിയാവുകയായിരിക്കും. പിന്നെ എന്ത് കൊണ്ട് ഇവിടം വിടുന്നില്ല എന്ന ചോദ്യം വരാം ..മനസ്സുറപ്പില്ലാ പെട്ടെന്ന് ഉള്ളത് വിട്ട് പറക്കുന്നതിനെ പിടിക്കാൻ എന്ന് കൂട്ടിക്കോളൂ. എങ്കിലും ശ്രമത്തിലാണ് :)

അരുണ്‍ കരിമുട്ടം said...

വളരെ വളരെ താമസിച്ച് പോയി..
ആശംസകള്‍

ബഷീർ said...

> അരുൺ കായംകുളം

വൈകി വന്നാലും ആശംസകൾ സ്വീകരിക്കുന്നതാണ്. സീകരിച്ചിരിക്കുന്നു സന്തോഷപൂർവ്വം. നന്ദി :)

Sureshkumar Punjhayil said...

Ashamsakal, Prarthanakal Njangalude vakayum...!!!

Related Posts with Thumbnails