Monday, April 13, 2009

പ്രതീകാത്മക എസ്‌.എം.എസ്‌. തട്ടിപ്പ് !

ഏതാണു നിങ്ങളുടെ മണ്ഡലം ?
ആരാണു നിങ്ങളുടെ സ്ഥാനാർത്ഥി ?


ഒരു തിരഞ്ഞെടുപ്പ്‌ മാമാങ്കത്തിലൂടെ ഇന്ത്യയിലെ ജനങ്ങൾ പോയികൊണ്ടിരിക്കയാണ്‌ അല്ലെങ്കിൽ അവരെ മാമാങ്കത്തിലേക്ക്‌ വലിച്ചഴച്ച്‌ കൊണ്ട്‌ പോയിക്കൊണ്ടിരിക്കയാണു നേതാക്കളും മാധ്യമങ്ങളും കൂടി. അന്നന്നത്തെ അഷ്ടിക്ക്‌ വകയുണ്ടാക്കാൻ നെട്ടോട്ടമോടുന്നവർ തൊട്ട്‌ അരമനയ്ക്കുള്ളിൽ സുഖശീതളിമായിൽ സുഷുപ്തിയിലാണ്ടവർക്ക്‌ വരെ തിരഞ്ഞെടുപ്പ്‌ കോലാഹല സംഭവ വികാസങ്ങൾ ചൂടോടെ എത്തിച്ച്‌ കൊണ്ടിരിക്കയാണ്‌ ബന്ധപ്പെട്ടവർ (നല്ല കാര്യം ..വേണ്ടത് തന്നെ)

നേതാക്കളൊക്കെ അലക്കിതേച്ച ചിരിയും ഫിറ്റ്‌ ചെയ്ത്‌ തെരുവായ തെരുവൊക്കെ തെണ്ടുകയാണിപ്പോൾ. എന്തൊരു എളിമ. എന്തൊരു വിനയം..! ചില്ലിട്ടു സൂക്ഷിക്കേണ്ട വാഗ്ദാനങ്ങൾ ..
തിരഞ്ഞെടുപ്പ്‌ കാലം ഉത്സവകാലം പോലെ ചൂഷണം ചെയ്ത്‌ കാശുണ്ടാക്കുന്നവരും നൂതന മാർഗങ്ങൾ കണ്ടെത്തുന്നു. മുദ്രാവാക്യം വിളിമുതൽ അപരന്മാർവരെ വിൽപനയ്ക്ക്‌ റെഡി. ആരോപണവും ആഹ്വാനവും പാർസലായി എത്തിച്ചു കൊടുക്കാൻ ഏജൻസികൾ.. അങ്ങിനെ തട്ടിപ്പുകളുടെയും വെട്ടിപ്പുകളുടെയും ഒരു പൂക്കാലം..

നാട്ടിൽ നടക്കുന്ന ഇലയനക്കങ്ങൾ വരെ ലൈവായി കാണുവാൻ ആഗ്രഹിക്കുന്ന പ്രവാസികൾക്ക്‌ പക്ഷെ നാട്ടിലേക്ക്‌ ചവിട്ടാനല്ലാതെ ( പൈസ അയക്കുന്നതിനു പറയുന്ന മലബാറി പ്രയോഗം ) വോട്ട്‌ അയക്കാൻ മാർഗമില്ലത്തതിനാൽ നാട്ടിൽ നിന്ന് വരുന്ന സന്ദേശങ്ങൾ കൈമാറിയും ,മെസ്സിലും ബാർബർ ഷോപ്പിലും ,ഷോപ്പിംഗ്‌ മാളിലെ കൌണ്ടറിൽ വരെ ചൂടുള്ള ചർച്ച സംഘടിപ്പിച്ച്‌ തങ്ങളുടെ സജീവത അറിയിച്ച്‌ കൊണ്ടിരിക്കയാണിപ്പോൾ.


ഏതാണു നിങ്ങളുടെ മണ്ഡലം ?
ആരാണു നിങ്ങളുടെ സ്ഥാനാർത്ഥി ?

യു.എ.ഇ യിൽ നിന്ന് പ്രക്ഷേപണം ചെയ്യുന്ന ഒരു റേഡിയോ ഏപ്രിൽ 16 നു നടത്താനിരിക്കുന്ന പ്രതീകാത്മക (?) എസ്‌.എം.എസ്‌ വോട്ട്‌ (തട്ടിപ്പ്‌ ) പരിപാടിയുടെ പരസ്യത്തിലെ വാചകങ്ങളാണിത്‌. ഈ പരസ്യം കേൾക്കുമ്പോഴൊക്കെ ഞാൻ അറിയാതെ ചോദിക്കും (മനസ്സിൽ ) അല്ല എന്താ നിങ്ങടെ പരിപാടി ? ഉത്തരം കിട്ടിയറ്റ്‌ ഇങ്ങിനെ.
' തിരഞ്ഞെടുപ്പ്‌ മഹാശ്ചര്യം.. ഞങ്ങൾക്കും കിട്ടണം കുറച്ച്‌ പണം' (എസ്‌.എം.എസി ലൂടെ )

അതെ, പ്രതീകാത്മക എസ്‌.എം.എസ്‌. തട്ടിപ്പ് !!

പ്രസവം മുതൽ അടിയന്തിരം വരെ എസ്‌.എം.എസ്‌ അയച്ച്‌ അഭിപ്രായ വോട്ടെടുപ്പ്‌ നടത്തുന്ന ദൃശ്യ-ശ്രാവ്യ മാധ്യമങ്ങൾ തിരഞ്ഞെടുപ്പും തങ്ങൾക്ക്‌ പോക്കറ്റ്‌ വീർപ്പിക്കാനുള്ള ഒരു അവസരമായി കാണുന്നതിൽ അവരെ കുറ്റം പറയാൻ കഴിയില്ല. കേട്ട പാതി കേൾക്കാത്ത പാതി സ്വന്തം മൊബൈൽ ഫോണിലെ ബാലൻസ്‌ തീർത്ത്‌ രോമാഞ്ചം കൊള്ളുന്ന ചിലരുണ്ട്‌ അവരെയാണു ബോധവത്കരിക്കേണ്ടത്‌.

നാട്ടിൽ പോയി വോട്ട്‌ രേഖപ്പെടുത്താൻ കഴിയാത്ത അതിനു അർഹതയില്ലാത്ത പ്രയാസമനുഭവിക്കുന്ന പ്രയാസികളെ ഉദ്ദേശിച്ച്‌ പ്രതീകാത്മക (പറ്റിക്കാത്മകമെന്ന് വിമർശകർ ) വോട്ടെടുപ്പ്‌ ഏപ്രിൽ 16 നു തന്നെ നടത്തുന്നു. ജി.സി.സി. യിൽ എല്ലായിടത്തും നിന്നും എസ്‌.എം.എസ്‌. അയച്ച്‌ കാശു കളയാനുള്ള അവസരമുണ്ട്‌. രണ്ട്‌ മൊബൈൽ കയ്യിൽ പിടിച്ച്‌ വോട്ട്‌ ചെയ്യാൻ മുട്ടി നിൽക്കുന്ന ഹാജ്യാരും (പരസ്യത്തിലെ കഥാപാത്രം) നാട്ടിൽ പോയി വോട്ടേഴ്സ്‌ ലിസ്റ്റിൽ പേരില്ലെന്ന് കണ്ട്‌ വിഷമിച്ച സുഹൃത്തിനെ ഗൾഫിലേക്ക്‌ മടക്കി വിളിക്കുന്ന (തിരികെ വന്നിട്ട്‌ എസ്‌.എം.എസ്‌ അയക്കാൻ ) കൂട്ടുകാരനുമൊക്കെ ഏപ്രിൽ 16 നു തങ്ങളുടെ പോക്കറ്റിലെ പൈസ ഈ വിധത്തിൽ കളയുമെന്ന് ഇവർക്ക്‌ ഉറപ്പുണ്ട്‌. (മുൻകാല അനുഭവം )

ഒരു എസ്‌.എം.എസ്‌ അയക്കാൻ 2 ദിർഹം (ഇന്നത്തെ റേറ്റ്‌ വെച്ച്‌ 28 രൂപയോളം ) ആണു ചാർജ്‌ അതിൽ ചെറിയ ഒരു ശതമാനം ഒഴിച്ച്‌ ബാക്കി തുക ഇവരുടെ പോക്കറ്റിൽ സുരക്ഷിതമായി എത്തുന്നു. കഴിഞ്ഞ തവണ നിയമസഭാ തിരഞ്ഞെടുപ്പിന് നടത്തിയ എസ്.എം.എസ് വോട്ടിംഗിലൂടെ പതിനായിരക്കണക്കിന് എസ്‌.എം.സുകളാണു ( അതിലൂടെ ദിർഹമുകളാണ് ) ഇങ്ങിനെ കൈ നനയാതെ ഇവരുണ്ടാക്കിയത്‌. പരസ്യങ്ങൾ പ്രക്ഷേപണം / സംപ്രേഷണം ചെയ്ത് ലഭിക്കുന്നതിനേക്കാൾ എത്രയോ ഇരട്ടി തുക യാതൊരു റിസ്കുമില്ലാതെ പലവിധ പരിപാടികളിലൂടെയും എസ്.എം.എസ് വഴി റേഡിയോ -ടെലിവിഷൻ മുതലാളിമാർ ഉണ്ടാക്കുന്നു. ഐഡിയ സ്റ്റാർ (കാശുണ്ടാക്കാനുള്ള ഒരോ ഐഡിയ ) സിങ്ങറുകളും മറ്റും ഉദാഹരണം.


പ്രിയ പ്രവാസി വോട്ടർ (വോട്ടില്ലാത്ത ) മാരെ നിങ്ങളുടെ എതിർ കക്ഷി എസ്.എം.എസ്. വിജയം ആഘോഷിക്കുന്നത്‌ തടയണ്ടേ ?. അനുയായികളെ ബോധവത്കരിക്കൂ .. മൊബൈൽ എടുക്കൂ ..തയ്യാറാകൂ.. എസ്‌.എം.എസ്‌. അയച്ച്‌ സ്ഥാനാർത്ഥികളെ വിജയിപ്പിക്കൂ..നഷ്ടപ്പെടാൻ കേവലം ദിർഹം മാത്രം ! കിട്ടാനുള്ളതോ....അത് എസ്.എം.എസിൽ തങ്ങാതെ നോക്കുക

ഈ നുറുങ്ങിനെ അനുകൂലിക്കുന്നവർ ‘നുറുങ്ങ്‌ യെസ്‌’ എന്നും അനുകൂലിക്കാത്തവർ ‘നുറുങ്ങ്‌ നോ’ എന്നും ടൈപ്പ് ചെയ്ത് ,ഒന്നിലും താത്പര്യമില്ലാത്തവർ അഥവാ ആരാന്റെ കയ്യിലെ കാശു പോവുന്നത് കൊണ്ട് നമുക്കെന്ത് നഷ്ടം എന്ന് കരുതുന്നവർ ബ്ലാങ്ക് എസ്.എം.എസും ‌ ഏതെങ്കിലും ഒരു നമ്പറിലേക്ക്‌ മെസേജ്‌ അയക്കുക. വരാനിരിക്കുന്നത്‌ എസ്‌.എം.എസിൽ തങ്ങില്ല എന്നല്ലേ..

54 comments:

ബഷീർ said...

തിരഞ്ഞെടുപ്പ്‌ മഹാശ്ചര്യം.. ഞങ്ങൾക്കും കിട്ടണം കുറച്ച്‌ പണം' (എസ്‌.എം.എസി ലൂടെ )

Sureshkumar Punjhayil said...

Basheere....ellavarum paisayundakkunna nerathu thanum kurachundakkan nokkathe mattullavarude kanjiyilenthinado mannuvariyidunnathu...!!!! ഞങ്ങൾക്കും കിട്ടണം കുറച്ച്‌ പണം...!!!! Nannayirikkunnu.. Ashamsakal..!!!

ബഷീർ said...

Suresh,

ആദ്യ എസ്.എം.എസിനു ആദ്യം നന്ദി
ആശംസകളും സ്വീകരിച്ചിരിക്കുന്നു :)

അപ്പോൾ താൻ വിമതനാണല്ലേ..
എന്റെ മൊബൈലിലേക്ക് പൈസ അയക്കേണ്ട ഫോർമാറ്റ് അറിയുമല്ലോ. വേഗമാവട്ടെ..

Anonymous said...

A wonderful writing indeed. I really wonder, how still the so called Malayali can say that they are the most literated ones!!!

We can see the literacy level of Mallus by the whooping profits easily being made by all TV's and radio networks by airing such a nonsense programs.

Vinu

പാവപ്പെട്ടവൻ said...

അതെ, പ്രതീകാത്മക എസ്‌.എം.എസ്‌. തട്ടിപ്പ് ആശുപത്രിയില്‍ കഴിയുന്ന നടിയുടെ
പ്രസവം, കുട്ടി ആണോ ? പെണ്ണോ ? (നടി പല്ലുവേദന ആയിട്ടാണ് ആശുപത്രിയില്‍ ) എല്ലാകാര്യങ്ങള്‍ക്കും SMS വഴി അഭിപ്രായം രേഖപ്പെടുത്താം. പട്ടാപകല്‍ പിടിച്ചുപ്പറിയില്‍ നിങ്ങള്‍ക്കും പങ്കാളിയകാം .
ആവിശ്യമായൊരു ലേഖനമാണ് . ഇന്നുകളിലെ ജാടകള്‍ ,പൊങ്ങച്ചങ്ങള്‍ തെളിച്ചു പറയുന്ന ഒരു ലേഖനം .വളരെ മനോഹരമായിരിക്കുന്നു

കുറുമ്പന്‍ said...

റേഡിയോക്കാര് ഇങ്ങക്ക് കൊട്ടേഷന്‍ കൊടുക്കുംന്നാ തോന്നണ്...

അല്‍ഭുത കുട്ടി said...

കൊഞ്ചികുഴഴലും, പുലയാട്ട് വര്‍ത്തമാനം ഒക്കെയായി ഗള്‍ഫിലേ കൊമേഴ്സ്യല്‍ റേഡിയോ കേള്‍ക്കുന്ന ഞരമ്പ് രോഗികളാണ് എസ്.എം.എസ് അയക്കുന്നത്. എസ്.എം എസ് അയക്കുന്നവര്‍ അതിന് ഇത്ര ദിര്‍ഹം ആകും എന്ന് അറിയാത്തവരല്ല. ഗള്‍ഫിലെ എല്ലാ റേഡിയോ നിലയങ്ങളും വാണിജ്യ അടിസ്ഥാനത്തില്‍ പ്രവര്‍ത്തിക്കുന്നവയാണ്. ആയതിനാല്‍ എസ്.എം.എസ് അയക്കുന്ന പോഴന്‍ മാര്‍ ആലോചിക്കണം അത് വേണമോ വേണ്ടയോ എന്ന്. ഞാന്‍ ന്യൂസുകള്‍ക്ക് മാത്രമാണ് ടി റേഡിയോ കേള്‍ക്കാറുള്ളത്.

അതിനാല്‍ എല്ലാവരും എനിക്ക് എസ്.എം.എസ് ചെയ്യണം
ഫോര്‍മാറ്റ് വര്‍ഗീയവാദി സ്പേസ് അല്‍ഭുതകുട്ടി.
ഡാങ്ക്സ്

കാസിം തങ്ങള്‍ said...

ഏത് പറ്റിക്കല്‍‌സ് പരിപാടിക്കും ഇഷ്ടം പോലെ ആളുകളെക്കിട്ടുന്നുണ്ടല്ലോ. കണ്ടാലും കൊണ്ടാലും പഠിക്കാത്തവരായി സമൂഹം മാറിയിരിക്കുന്നു. അത് കൊണ്ടാണല്ലോ റിയാലിറ്റി ഷോകളും എസ് എം എസ് മത്സരങ്ങളുമൊക്കെ അരങ്ങ തകര്‍ക്കുന്നത്.

പോരാളി said...

വ്യാപകമായ എസ് എം എസ് തട്ടിപ്പുകളുടെ ഗണത്തില്‍ മറ്റൊന്ന് കൂടി.

ബഷീർ said...

>വിനു,

എല്ലാവരെയും പറ്റിക്കാൻ കിട്ടില്ല. പക്ഷെ ചിലരെയെങ്കിലും ഇങ്ങിനെ ഇംഗിതത്തിനു കിട്ടുന്നത് കൊണ്ട് അവർ ലാഭമുണ്ടാക്കുന്നു. ഇണ്ണാമ്മന്മാർ (അർത്ഥം ചോദിക്കരുത് ) വീണ്ടും വീണ്ടും എസ്.എം.എസ് അയച്ച് കാശ് കളയുന്നു. അഭിപ്രായത്തിനു നന്ദി

> പാവപ്പെട്ടവൻ

കമന്റ് ചിരിപ്പിച്ചു. എസ്.എം.എസ് അയക്കുന്നവരെ ഓർത്ത് ,സംഘടിപ്പിക്കുന്നവരും ഉള്ളിൽ ചിരിക്കുന്നുണ്ടാവും. അഭിപ്രായം അറിയിച്ചതിൽ സന്തോഷം


>കുറുമ്പൻ

അങ്ങിനെയാണെങ്കിൽ അതിനും അവർ എസ്.എം.എസ് മത്സരം നടത്തും..:)

> അത്ഭുതകുട്ടി

താങ്കൾക്ക് തീ‍ർച്ചയായും കിട്ടാനുള്ള വക കാണുന്നുണ്ട്.. എസ്.എം.എസ്..

നമ്മളിതിനെ വിമർശിച്ചാൽ അതിനെ വിമർശിച്ച് എസ്.എം.എസ് അയക്കാനും ഈ പോഴന്മാർ റെഡി..

>കാസിം തങ്ങൾ ,

കഷ്ടം തന്നെ ഇവരുടെ കാര്യം . മാസങ്ങളായി വീട്ടിലേക്ക് വിളിക്കാത്തവനും ഈ വക പരിപാടികളിൽ പൈസ കളയാൻ യാതൊരു മടിയുമില്ല.


>ശ്രീ

ചിരിക്കാതെ എസ്.എം.എസ് അയക്കൂ

>കുഞ്ഞിക്ക

എന്ത് ചെയ്യാം ദിവസം ഒരു നാലഞ്ച് എസ്.എം.എസ് എങ്കിലും അയച്ചില്ലെങ്കിൽ ഉറക്കം വരാത്തവരുണ്ടത്രെ.. പിന്നെ പറ്റിക്കൽ നടക്കാതിരിക്കുമോ

അഭിപ്രായം അറിയിച്ചവൽക്കെല്ലാം വളരെ നന്ദി

thoufi | തൗഫി said...

കാലികപ്രസക്തമായ കുറിപ്പ്.

ആര്‍ത്തിയും ആസക്തിയും മാത്രമാണ് ജീവിതാസ്വാദനമെന്നും അതില്ലാത്തവരെല്ലാം ഇന്നിന്റെ കാലത്ത് ജീവിക്കാന്‍ കൊള്ളാത്തവരുമാണെന്നുമുള്ളൊരു മിധ്യാധാരണ നമ്മുടെ സമൂഹത്തില്‍ എങ്ങനെയോ രൂഡമൂലമായിട്ടുണ്ട് എന്നതിന്റെ ഒടുവിലത്തെ ഉദാഹരണങ്ങളിലൊന്നാണ് ഇത്തരം എസ് എം എസ് തട്ടിപ്പുകള്‍. ആരാന്റെ പോക്കറ്റിലെ പണം വിയര്‍ക്കാതെയും രകത്മൊഴുക്കാതെയും തന്റെ പോക്കറ്റിലെത്തിക്കാനുള്ള വിദ്യയുമായി നടക്കുന്ന കുബുദ്ധികള്‍ക്ക് നന്നായറിയാം, രണ്ടാമതൊന്നാലോചിക്കാന്‍ മെനക്കെടാന്‍ നില്‍ക്കാതെ മലയാളി ഇതിനെയും സ്വീകരിക്കുമെന്ന്. അതു തന്നെയാണ് ഇക്കൂട്ടരുടെ ലക്ഷ്യവും വിജയരഹസ്യവും.

നാം നമ്മെ തിരിച്ചറിയുക എന്നതു മാത്രമാണ് പോംവഴി.തലച്ചോറ് മറ്റാര്‍ക്കും പണയം വെക്കാന്‍ കഴിയാത്ത ഒരു സമൂഹത്തിന്റെ ഉയിര്‍ത്തെഴുന്നേല്‍പ്പാവട്ടെ നമ്മുടെ സ്വപ്നം.

-- മിന്നാമിനുങ്ങ്

Anonymous said...

പൊതുവേ മലയാളി ഹിപ്പോക്രാറ്റ് ആണ്-ഞാനടക്കം- അതിനാല്‍ ഇതൊന്നും ആരും സ്പര്‍ശിക്കാത്ത വിഷയമാണ്.
എനിക്ക് തോന്നുന്നു,ഇന്ന് ഒരുപക്ഷെ രാഷ്ട്രീയ ക്കാരെക്കാള്‍ കൂടുതല്‍ ജീര്‍ ണി ച്ചത്, മാധ്യമങ്ങളും judiciaryയും ആണെന്ന്. എന്തുകൊണ്ടെന്നാല്‍, രാഷ്ട്രീയ ക്കാര്‍,ശക്തമായ വിചാരണക്ക് പാത്രമാകാരുണ്ട്.മാധ്യമങ്ങള്‍ ഇന്ന് എന്ത് തോന്നിയവാസവും ചെയ്യാനുള്ള മീഡിയ ആയി പോലും മാറിയിരിക്കുന്നു.ഉദാഹരണങ്ങള്‍ ഒരുപാടുണ്ട്. judiciaryയും അങ്ങനെ തന്നെ.പല പാശ്താത്യ നാടുകളിലും,ജഡ്ജിമാര്ടെ സ്വത്ത് വെളിപ്പെടുത്തണം എന്ന നിയമമുണ്ട്.ഈ നിര്‍ദ്ദേശം ഈയിടെ പൊങ്ങി വന്നപ്പോള്‍ അതു സുപ്രീംകോടതി തന്നെ തള്ളി.കാരണം അതൊക്കെ പുറത്തറിഞാല്‍....???

വിഷയം വ്യത്യസ്തവും,ആര്ജ്ജവമുള്ളതും ആണെന്ന് തോന്നി,നന്നായിരിക്കുന്നു..
( ഇതൊക്കെ കണ്ടും കേട്ടോണ്ടും ഇരിക്കുന്ന ഒരു പ്രവാസി.)

siva // ശിവ said...

എനിക്ക് പലപ്പോഴും തോന്നുമായിരുന്നത്....താങ്കള്‍ അതിനെ വ്യക്തമായി എഴുതിയിരിക്കുന്നു.... നന്ദി.....

അഞ്ചല്‍ക്കാരന്‍ said...

കഴിഞ്ഞ നിയമസഭാ തിരഞ്ഞെടുപ്പിലും ഉണ്ടായിരുന്നു ഈ പോഴത്തം. അന്ന് കുറ്റിപ്പുറത്തെ കുഞ്ഞാലികുട്ടിയ്ക്ക് വേണ്ടി ലേബര്‍ ക്യാമ്പുകളിലെ ബംഗാളികളുടെ മൊബൈലില്‍ നിന്നു വരെ വോട്ട് രേഖപ്പെടുത്തപ്പെട്ടു എന്നാ കേട്ടത്.

ലേഖനത്തില്‍ ഒരു പിശകുണ്ട്. നിയമസഭാതിരഞ്ഞെടുപ്പിന് ആകെ ഇരുപത്തിആറായിരത്തി ചില്വോനം എസ്.എം.എസേ കിട്ടിയുള്ളൂ എന്നാണ് പിന്നാമ്പുറം. അതായത് പ്രതീക്ഷച്ചത്ര പോഴന്മാരല്ല പ്രവാസത്തില്‍ ഉള്ളതെന്നു...

അതു കഴിഞ്ഞിട്ട് എസ്.എം.എസ് വോട്ടെണ്ണല്‍ ഉണ്ടായിരുന്നു. നാട്ടിലെ തിരഞ്ഞെടുപ്പിന്റെ തലേന്ന്. ഫലം: നൂറ്റി ഇരുപത്തി നാലു സീറ്റില്‍ യൂ.ഡി.എഫ് വന്‍ ഭൂരിപക്ഷത്തോടെ വിജയിച്ചു!

കാണ്‍ഗ്രസിന്റേയും ലീഗിന്റേയും പ്രവാസീ നേതാക്കന്മാര്‍ റേഡിയോ നിലയത്തിലെ തത്സമയ അവലോഗനത്തില്‍ കയ്യും മെയ്യും മറന്ന് ആര്‍ത്തലച്ചു. പിറ്റേന്ന് വരാന്‍ പോകുന്ന ഇലക്ഷന്‍ ഫലം എസ്.എം.എസ് വോട്ടെടുപ്പിനു തുല്യമായിരിയ്ക്കുമെന്ന് ലവന്മാര്‍ക്ക് ഒരു സംശയവും ഉണ്ടായിരുന്നില്ല. ഉണ്ണാക്കന്മാര്‍...

പിറ്റേന്ന് നാട്ടില്‍ ഫലം വന്നു. ഹതു പിന്നെ അങ്ങിനെയിങ്ങനെ അങ്ങിനെയിങ്ങനെ....

അനില്‍@ബ്ലോഗ് // anil said...

ചത്തവാര്‍ത്തയായാലും ജനിച്ച വാര്‍ത്തയായാലും വിറ്റു കാശുണ്ടാക്കണം എന്നതാണ് ഇന്നത്തെ നയം. എസ്.എം.എസ് എന്നത് പുതുനൂറ്റാണ്ടിന്റ്റെ തട്ടിപ്പറിയും.

വാഴക്കോടന്‍ ‍// vazhakodan said...

ബഷീറേ,നാട്ടുകാരാ,
കാടടച്ച് വെടി വെച്ചോ എന്നൊരു സംശയമുണ്ട്‌. ഈ എസ് എം എസ് അയക്കുന്ന ഒരു കണക്കു കൂടി ഉണ്ടായിരുന്നെങ്കില്‍ പ്രസക്തമായേനെ. അഞ്ചല്‍കാരന്‍ പറഞ്ഞ ഇരുപത്തയ്യായിരവും ബഷീര്‍ പറഞ്ഞ ലക്ഷക്കണക്കും തീരെ യോജിക്കുന്നില്ലല്ലോ. അപ്പോള്‍ എല്ലാവരും എസ് എം എസ് അയക്കുന്നില്ലല്ലോ. ഇനി എസ് എം എസ് അയക്കുന്നവരെക്കുറിച്ചൊരു പരിശോധന നടത്തിയാല്‍ അത് കടുത്ത രാഷ്ട്രീയ അനുഭാവികളായിരിക്കും എന്ന് നേരത്തെ പുറത്തു വന്ന നിയമസഭാ ഫലം കാട്ടിത്തരുന്നു. ചില ചര്‍ച്ചകളാണ് ഈ പറഞ്ഞ റേഡിയോയുടെ ഹൈ ലൈറ്റ്. ദൃശ്യമാധ്യമത്തിലെ കോമഡി പരിപാടികള്‍ തോറ്റു പോകും! പിന്നെ പ്രവാസികളുടെ ചെറിയ ചെറിയ ദൌര്‍ഭല്യങ്ങളെ ചൂഷണം ചെയ്യുക അതില്‍ നിന്നും സാമ്പത്തിക ലാഭം ഉണ്ടാക്കുക. അവര്‍ക്കും നില നില്‍ക്കണ്ടേ? ഇവിടെ എല്ലാ കമ്പോളവല്‍ക്കരിക്കപ്പെട്ടപ്പോള്‍ എസ് എം എസും അതിന്റെ ഭാഗമായി എന്ന് പറയുന്നതാണ് ശരി. പാവപ്പെട്ടവന്‍ ചോദിച്ച ചോദ്യത്തിന് ഉള്ളത്ര നിലവാരം പോലും ദിവസവും ഇവര്‍ ചോദിക്കുന്ന ചോദ്യങ്ങള്‍ക്കില്ല എന്ന് ബഷീറിനും അറിയാമല്ലോ.
അപ്പൊ പറഞ്ഞു വന്നത് എസ് എം എസ് അയക്കുന്ന കൂട്ടത്തിലും റേഡിയോ ചര്‍ച്ചയില്‍ കൂലംഗുഷമായി പങ്കെടുക്കുന്നവരുടെ കൂട്ടത്തിലും എല്ലാ പ്രവാസികളും ഇല്ല. ഇനിയും അവരെക്കുറിച്ചു എഴുതിയാല്‍ അത് വേറൊരു പോസ്റ്റായി ഇടേണ്ടി വരും.(എന്നാലും തീരില്ല)
കമന്റ്: രണ്ടു ദിര്‍ഹത്തില്‍ എട്ടിസലാത്തിന്റെയും എജെന്സിയുടെയും പങ്ക് കഴിച്ച് കിട്ടുന്നതില്‍ അതിന് മാത്രം ലാഭം ഉണ്ടാവുമോ? അതൊന്നു അന്വേഷിക്കാമെന്ന് തോന്നുന്നു.
കാര്യങ്ങള്‍ ചര്‍ച്ചയായത്തില്‍ സന്തോഷം.

Anuroop Sunny said...

ഹോ,
ആര്‍ക്കെന്തു നഷ്ടം.??
പുതുമയുള്ള trick ഒന്നുമല്ലല്ലോ..

ബഷീർ said...

>മിന്നാമിനുങ്ങ് ,

തീർച്ചയായും ഒരു തിരിച്ചറിവാണു നമുക്ക് വേണ്ടത്.
അഭിപ്രായത്തിനു നന്ദി


>അനോണിമസ് 1

ജീർണ്ണത എല്ലാ മേഖലകളിലും ബാധിച്ചത് പൊലെ മാധ്യമ രംഗത്തും ഉണ്ടെന്നത് സത്യം. എല്ലാ ജീർണ്ണതകളും കാലക്രമേണ മഹത്വവത്കരിക്കപ്പെടുന്നതും കണ്മുന്നിൽ കാണൂകയാണ് നാം. അഭിപ്രായം പങ്കുവെച്ചതിന് നന്ദി.. ഈ രംഗത്ത് തന്നെ പ്രവർത്തിക്കുന്ന ആളാണോ അനോണി എന്നൊരു സംശയം..:)

> ശിവ

സമാന ചിന്താഗതിക്കാർ ഏറെയുണ്ടെന്നറിയുന്നതിൽ സന്തോഷം. അറിയിച്ചതിലും

> അഞ്ചൽക്കാരൻ,

വിശദമായ കമന്റിനു വളരെ നന്ദി

താങ്കൾ ചൂണ്ടിക്കാണിച്ച പിശക് തിരുത്തി..അതെ താങ്കൾ പറഞ്ഞതാണ് ശരി. അന്ന് ഇത്ര വിപുലമായി പരസ്യം ഉണ്ടായിരുന്നില്ലെന്ന് തോന്നുന്നു.എന്നിട്ടും ഈസിയായി അത്രയും കിട്ടി. ഇത്തവണ നോക്കാം. പിന്നെ ആ റിസൾട്ട് ..അത് ശരിക്കും കോമഡിയായിരുന്നുവെന്നതിൽ സംശയമില്ല. ഒരു തമാശയ്ക്കായി ഇത്തവണയും പ്രതീക്ഷിക്കാം അല്ലേ..

>അനിൽ@ബ്ലോഗ്

എല്ലാം കച്ചവടവത്കരിക്കപ്പെടുകയല്ലേ അനിൽ
സ്നേഹബന്ധങ്ങൾ വരെ.. ഇതിലപ്പുറവും പ്രതീക്ഷിക്കാം. നന്ദി


>വാഴക്കാടൻ

തിരുത്തിയിട്ടുണ്ട്.. അഞ്ചൽക്കാരൻ പറഞ്ഞതാണ് ശരി.. പിന്നെ നാട്ടിലെ റേറ്റ് വെച്ച് കൂട്ടിയാൽ പതിനായിരം വേണ്ടല്ലോ ലക്ഷമാവാൻ :)

റേഡിയോ ചർച്ചകളിൽ ചിലപ്പോൾ പങ്കെടുക്കാൻ നിർബന്ധിതനാവാറുണ്ട്.പശു എന്ന വിഷയം ആയിരിക്കും ചർച്ച ചെയ്യുന്നത്. പശുവിനെ കൊണ്ട് പോയി ഒരു തെങ്ങിൽ കെട്ടിയിടും എന്നിട്ട് വാഴ യെ പറ്റി വാതോരാതെ സംസാരിക്കും പലരും. അതിനെ പറ്റി പറയാതിരിക്കലാണ് ഭേതം. എന്നാലും നമ്മുടെ അഭിപ്രായം ആ വിഷയത്തിൽ പറയാൻ ഒരു അവസരം എന്ന് മാത്രം അതിനെ കണക്കാക്കാം. എന്നാൽ എസ്.എം.എസ് ( തിരഞ്ഞെടുപ്പ് ഒരു പ്രതീകം മാത്രം ) അയച്ച് കാശ് കളയുന്ന എത്രയൊ ആയിരങ്ങൾ ഗൾഫ് നാട്ടിൽ തന്നെയുണ്ട്. മിക്കവരും സാധാരണക്കാർ.

പിന്നെ 2 ദിർ ഹത്തിൽ എജൻസിക്കും മറ്റും പോകുന്ന ചിലവ് കഴിച്ചാലും നല്ല തുക ഇതിന്റെ പ്രായോജകർക്ക് തന്നെ യെന്നാണറിവ്. അതിനെ പറ്റി അന്വേഷിക്കാവുന്നതാണ്. കൂടുതൽ വ്യക്തമായി അറിയുന്നവർ എഴുതുമല്ലോ..

റിയാലിറ്റി ഷോകളിലെക്ക് മറ്റും അയച്ച് കിട്ടുന്ന എസ്.എം.എസിലൂടെ ലക്ഷങളാണ് ചാനലുകാരും മറ്റും ഉണ്ടാക്കുന്നതന്നെ വായിച്ചിരുന്നു.


>അനുരൂപ്

പുതുമയുള്ളതൊന്നുമല്ല, ഓരോ കാരണം കണ്ടെത്തുന്നു വെന്ന് മാത്രം എസ്.എം.എസ് അയപ്പിക്കാൻ

എല്ലാവർക്കും നന്ദി


===================

രാഷ്ടീയം തലക്ക് പിടിച്ചവർ മുഴുവൻ ഈ വക പോഴത്തങ്ങൽക്ക് പൈസ കളയുമെന്ന് തോന്നുന്നില്ല. പ്രധാന കാരണം ഇതിന്റെ ഉള്ളുകള്ളികളെ പറ്റി ബോധമില്ലായ്മയാണെന്ന് തോന്നുന്നു. തന്റെ പോക്കറ്റിലെ പൈസ പോവുക എന്നതൊഴിച്ച് (അത് ഏജൻസിക്കായാലും നടത്തുന്നവർക്കായാലും ) പ്രത്യേകിച്ച് ഫലമൊന്നുമില്ലെന്ന് അവർ അറിയേണ്ടിയിർക്കുന്നു.

എസ്.എം.എസ്. മാനിയ പിടിപ്പെട്ട എല്ലാവർക്കും രോഗശമനമുണ്ടാവട്ടെ എന്ന് പ്രാർത്ഥിക്കുന്നു.

ബിനോയ്//HariNav said...

എന്റെ സ്വന്തമായി ഇരു "നുറുങ്ങ് എസ്". എസ് എം എസ് അയച്ച് കാമം കരഞ്ഞു തീര്‍ക്കുന്ന പോഴന്മാര്‍ക്കു വേണ്ടി ഒരു "ബ്ലാങ്കും" :)

ബഷീർ said...

>ബിനോയ്

എസ്.എം.എസിനു നന്ദി..
അഭിപ്രായ വോട്ടെടുപ്പിൽ പങ്കെടുത്തതിൽ വളരെ സന്തോഷം

നാളെയാണീ കോമഡി പരിപാടി.എല്ലാ‍വരും മൊബൈൽ എടുത്ത് തയ്യാറാവൂ വേഗമാവട്ടെ..

. said...

ഉപഭോഗ സംസ്കാരത്തിന്റെ ഭാഗമാണിതെല്ലാം
നമുക്കെന്ത്‌ ചെയ്യാൻ കഴിയും സന്തോഷ്‌ ഏച്ചിക്കാനത്തിന്റെ
"കൊമാല" എന്ന കഥയിൽ ഇതേ വിഷയം
മറ്റൊരു തരത്തിൽ അവതരിപ്പിക്കുന്നുണ്ട്‌

ബഷീർ said...

> എന്റെ വീട് ചേച്ചീ

അതെ, പൊങ്ങച്ചത്തിന്റെയും കൂടി..
ഇവിടെ വന്ന് വായിച്ച് അഭിപ്രാ‍യം പങ്ക് വെച്ചതിൽ വളരെ സന്തോഷം. നന്ദി

പകല്‍കിനാവന്‍ | daYdreaMer said...

:)
ആട് തേക്ക് മാഞ്ചിയം .. ഈ വാക്കുകള്‍ ഓര്‍മ്മ വരുന്നു.. !
എത്ര അനുഭവങ്ങള്‍ ഉണ്ടായാലും മലയാളി പഠിക്കില്ലല്ലോ.. !

വിവേക്‍‍ said...

http://vaayana-nireekshanam.blogspot.com/2009/04/blog-post_15.htm

ഇതു കൂട്ടി വായിക്കുക, എസ്സെമ്മെസ്സ് അയക്കുന്നതിന്‍‍ മുമ്പ് ഉപകരിക്കും.

muham said...

പൊതു ജനം കഴുതകൾ എന്ന് റേഢിയോക്കാർക്ക് അറിയാം.
അത് കൊണ്ടാണല്ലോ ആവർത്തന വിരസത കൊണ്ട് ചർദ്ദിക്കാൻ വരുമ്പോഴും ഈ റേഡിയോക്കാർ എസ് എം എസ് അയക്കേണത് എങനെ എന്ന് പഠിപ്പിച്ച് കൊണ്ടിരുന്നത്
ഏതായാലും ഈ തട്ടിപ്പിനു പ്രതികരിക്കാൻ അവസരമുണ്ടാക്കി ഈ വിഷയത്തിൽ പോസ്റ്റിട്ട ബശീരിനു എന്റെ എസ് എം എസ്!

ബിന്ദു കെ പി said...

തികച്ചും കാലികപ്രസക്തമായ വിഷയം. ഞങ്ങളിവിടെ മിക്കപ്പോഴും ചർച്ചചെയ്യുന്നത്...ബഷീറതു നന്നായി പറഞ്ഞിരിയ്ക്കുന്നു..

അരുണ്‍ കരിമുട്ടം said...

ബഷീറിക്കാ,
അവസരോചിതമായി അവതരിപ്പിച്ചു
അഭിനന്ദനങ്ങള്‍
(ഒരു ഉണ്ണാക്കന്‍)

ബഷീർ said...

>വിവേക്

തന്ന ലിങ്കിൽ പോയി വാ‍യിച്ചു. :) അനുമാനങ്ങൽ സങ്കല്പങ്ങൾ നടക്കട്ടെ. കാത്തിരുന്നു കാണാം. നന്ദി

>മുഹം
അഭിപ്രായത്തിനും എസ്.എം.എസിനും നന്ദി
ഇത്തവണ കനത്ത പോളിംഗ് (എസ്.എം.എസ് ) നടന്നുവെന്നാണ് കേൾക്കുന്നത്..


> ബിന്ദു കെ.പി

സമാന ചിന്താഗതിക്കാരെ കാണുന്നതിൽ സന്തോഷം. പക്ഷെ കഴിഞ്ഞ തവണത്തേക്കാൾ കൂടുതലാണത്രെ ഇത്തവണ. അഭിപ്രായം അറിയിച്ചതിൽ സന്തോഷം

> അരുൺ കായംകുളം

അഭിനന്ദനങ്ങൾ എസ്.എം.എസ് ആയി അയക്കാനുള്ള സംവിധാനം അടുത്ത തവണ ഏർപ്പെടുത്താം :) ഇവിടെ വന്ന് അഭിപ്രായം അറിയിച്ചതിൽ നന്ദി

============
വിമർശനങ്ങൾ തൃണവത്ഗണിച്ച് കൊണ്ട് ഉണ്ണാക്കന്മാരും ഉണ്ണാക്കികളും എസ്.എം.എസ് അയച്ച് ശതമാനം കൂട്ടിയെന്നാണ് റിപ്പോർട്ട്.

ബഷീർ said...

പ്രിയരെ
സമൂഹത്തിൽ പടർന്നു പന്തലിച്ച ചില കാര്യങ്ങളെ (നന്മയോ തിന്മയോ ) കുറിച്ച് അവരവർക്കുള്ള അഭിപ്രാ‍യം ,പ്രതികരണം അത് ക്രിയാത്മകമായി അറിയിക്കേണ്ടവരെ അറിയിക്കേണ്ട വിധത്തിൽ അറിയിക്കുന്നവർ നമുക്കിടയിലുണ്ടെന്നറിയാം. പ്രതികരണ ശേഷിയുള്ള ഒരു സമൂഹം ഇന്നും നിലനിക്കുന്നതിനാൽ ചൂഷകർക്ക് എന്നും അത് തലവേദനയും ഉണ്ടാക്കൂന്നു. ഒരു തിന്മയെ പ്രത്യക്ഷത്തിൽ എതിർക്കാൻ കഴിഞില്ലെങ്കിൽ അതിനെ ഏറ്റവും ചുരുങ്ങിയത് മനസ്സു കൊണ്ടെങ്കിലും വെറുക്കുക എന്നത് നമ്മുടെ കടമയാണ്.

നാം എതിർക്കുന്ന ഒരു കാര്യം മറ്റ് പലർക്കും നല്ലതെന്ന് തോന്നുന്നതായിരിക്കുക സ്വഭാവികം.അപ്പോൾ വിമർശകനെ വ്യക്തിപരമായി ആക്ഷേപിക്കുന്നത് പ്രോത്സാഹനം അർഹിക്കുന്നില്ല മറിച്ച അയാൾ ഉയർത്തിയ വിമർശനങ്ങളെ ആശയപരമായി തന്നെ ചെറുക്കാ‍ൻ കഴിയണം.

അങ്ങിനെയാവട്ടെ പ്രതികരണങ്ങൾ അല്ലാത്തത് പ്രോത്സാഹിപ്പിക്കാൻ നിർവഹമില്ല.

നന്ദിപൂർവ്വം

ബഷീർ said...

>പകൽകിനാവൻ

അതെ.. കണ്ടാലും കൊണ്ടാലും പഠിക്കാത്തവരാണിങ്ങനെ പറ്റിക്കപ്പെടുന്നത്. പിന്നെ അന്തമാ‍യ രാഷ്ട്രീയ ബോധക്കേടും !

കുഞ്ഞന്‍ said...

ഹൊ എനിക്ക് രോമാഞ്ചം..! ഈ എസ്സ് എമ്മെ സ് പൊട്ടിക്കുമ്പോള്‍ ആര്‍ക്ക് ഭൂരിപക്ഷം കിട്ടുമെന്ന് ആധികാരികതയോടെ മനസ്സിലാക്കാന്‍ പറ്റുമല്ലൊ, ഇത്രയും നല്ല സേവനം ചെയ്യുന്ന ഇവര്‍ ഒരു ചെറിയ ലാഭം ഉണ്ടാക്കട്ടെ ബഷീര്‍ ഭായി...


രണ്ടു ദിര്‍ഹം പോയാലെന്താ കേരളം ആര്‍ക്കെന്നറിയാന്‍ അടുത്തമാസംവരെ വീര്‍പ്പുമുട്ടി കുത്തിരി‍ക്കേണ്ടല്ലൊ...!!!!!!!

ബഷീര്‍ മാഷെ, ഈ പ്രതീകാത്മ വോട്ടെടുപ്പില്‍ ആര്‍ക്കാണ് വിജയം? മണ്ഡലം തിരിച്ച് ഒന്നു പറയാമൊ? എന്നിട്ടുവേണം ചില ബ്ലോഗില്‍ പോയി ധൈര്യത്തോടെ വെല്ലുവിളിക്കാന്‍..

ബഷീർ said...

>കുഞ്ഞൻ ഭായ്

പെട്ടി പൊട്ടിച്ചിട്ടില്ലത്രെ.. പൊട്ടിയ്ക്കാൻ എസ്.എം.എസ്. അയച്ചവരുടെ പ്രതിനിധികളെ ക്ഷണിച്ചിട്ടുണ്ട്. യു.എ.ഇ യിൽ നിന്ന് കിട്ടിയ എസ്.എം.എസിന്റെ അത്രയും മറ്റ് ജി.സി.സി രാജ്യങ്ങളിൽ നിന്നായി കിട്ടിയെന്ന് പറയുന്നത് കേട്ടു.

ഫല (?) പ്രഖ്യാപനം വരുമ്പോൾ അപ്ഡേറ്റ് ചെയ്യാം.

Typist | എഴുത്തുകാരി said...

ഒരുപാട് പേര്‍ അയക്കാന്‍ ഉണ്ടായിട്ടാണല്ലോ ഈ SMS തട്ടിപ്പു് മുന്നോട്ടുപോവുന്നതു്.അവര്‍ക്കു ഇതു തട്ടിപ്പാണെന്നു മനസ്സിലായിട്ടു ‍ നിര്‍ത്തുന്നെങ്കില്‍ നിര്‍ത്തട്ടെ, അല്ലെങ്കില്‍ അവരുടെ കാശു പോവട്ടെ എന്നു വക്കാം, നമുക്കു്.

കുഞ്ഞന്‍ said...

ബഷീര്‍ മാഷെ,

അവര്‍ റിസല്‍റ്റ് പ്രഖ്യാപിച്ചൊ?..ഉണ്ടെങ്കില്‍ എന്റെ ഈ കമന്റ് ഡിലിറ്റ് ചെയ്യുക ഇല്ലെങ്കില്‍...എന്റെ ഊഹം ശരിയാണെങ്കില്‍ അവര്‍ ഈ റിസല്‍റ്റ് ഉടനെ പ്രഖ്യാപിക്കുകയില്ല എന്തെന്നാല്‍ കഴിഞ്ഞ തവണ നടിത്തിയ ഈ പ്രതീകാത്മക വോട്ടെടുപ്പിന്റെ പ്രഖ്യാപനം അക്ഷരം പ്രതി ശരിയായിരുന്നുവല്ലൊ..! കേരളത്തില്‍ വോട്ടെടുപ്പിന്റെ റിസല്‍റ്റ് വരുന്നതനുസരിച്ചേ ഇവര്‍ റിസല്‍റ്റ് പ്രഖ്യാപിക്കുകയൊള്ളുവെന്നാണ് എനിക്കു തോന്നുന്നത്. ആ ട്രെന്റ് നോക്കിയിട്ട് ഇവര്‍ ഫല പ്രഖ്യാപനം നടത്തും. അതിനു മുമ്പ് പ്രഖ്യാപനം നടത്തിയാല്‍ കഴിഞ്ഞ തവണത്തെപ്പോലെ ശരിയാകാതെ വന്നാലൊ..?? ഇനിയൊരു തിരഞ്ഞെടുപ്പ് വരുമ്പോള്‍ ഇങ്ങനെയൊരു കളിയില്‍ ആളുകള്‍ പങ്കെടുക്കുകയില്ലെന്ന് അവര്‍ക്കറിയാം. അപ്പോള്‍ പറഞ്ഞുവരുന്നത് കഴിഞ്ഞ തവണത്തെ അബദ്ധം ഈത്തവണ ആവര്‍ത്തിക്കുകയില്ലന്ന് കരുതാം- എസ് എം എസ് റിസല്‍റ്റ്. ആയതിനാല്‍ ഇത്തവണ ഇവരുടെ ഫലപ്രഖ്യാപനം 99% വും കേരളത്തിലെ റിസല്‍റ്റിനോട് ഒത്തുപോകുന്നതായിരിക്കും..!

salmanybx said...

Basheere....ellavarum paisayundakkunna nerathu thanum kurachundakkan nokkathe mattullavarude kanjiyilenthinado mannuvariyidunnathu...!!!! ഞങ്ങൾക്കും കിട്ടണം കുറച്ച്‌ പണം...!!!! Nannayirikkunnu.. Ashamsakal..!!!

ബഷീർ said...

> എഴുത്തുകാരി

അങ്ങിനെയങ്ങ് തള്ളിക്കളയാൻ പറ്റുന്നില്ല. :) കണ്ടറിയാത്തവർ കൊണ്ടാലുമറിയാത്തവരും !!പിന്നെ എന്ത് ചെയ്യും അല്ലേ ?


> കുഞ്ഞൻ ഭായ്

റിസൽട്ട് വന്നിട്ടില്ല.. എന്നാണെന്നും പ്രഖ്യാപിച്ചിട്ടില്ല.
കാത്തിരിക്കുക..

>അബ്ദുൽ

നമ്മക്കിങ്ങനയൊക്കെയല്ലേ സഹായിക്കാൻ പറ്റൂ. :)

വന്നതിനും അഭിപ്രായം പങ്കുവെച്ചതിനും നന്ദി

ഉസ്മാന്‍ പള്ളിക്കരയില്‍ said...

സാമൂഹികാംഗീകാരത്തോടെ നടത്തപ്പെടുന്ന എസ്.എം.എസ് തീവെട്ടിക്കൊള്ളക്കെതിരെ ആഞ്ഞടിച്ചിരിക്കുന്നുവല്ലോ.

ആര്‍ജ്ജവമുള്ള രചന.
അവസരോചിതം.

അഭിനന്ദനങ്ങള്‍.

കേഡി കത്രീന said...

ഭാര്യയ്കു ഒന്നു ഫോൺ ചെയ്യാൻ യെവന്മാരുടെ കൈയ്യിൽ കാശില്ല..എസ്‌ എം എസ്‌ അയക്കാൻ യെവിടുന്നണാവൊ!വോ!വോ!യെന്തരു പറയാനാ...

ബഷീർ said...

>പള്ളിക്കരയിൽ

പിന്തുണയ്ക്ക് നന്ദി.
ഈ പരിപാടികളൊക്കെ നടക്കുന്നത് സമൂഹത്തിന്റെ അംഗീകാരത്തോടെ എന്ന് പറയാൻ പറ്റില്ല. ഒരു വിഭാഗം ഇതിലൊക്കെ അടിമകളായി കാശു കളയുന്നു എന്ന് മാത്രം.

>കേഡി കത്രീന

യെവന്മാരോടൊപ്പം യെവളുമാരും ഉണ്ട് കെട്ടോ.ഇതിനൊക്കെ സപ്പോർട്ട് ചെയ്ത്.
ചില യെവളുമാർ റേഡിയോയിലൊക്കെ കൊഞ്ചുന്നത് കേട്ടാൽ റേഡിയോ തല്ലിപ്പോളിക്കാൻ തോന്നും :)

ഇരുമ്പുഴിയൻ said...

അത്യുഗ്രൻ പോസ്റ്റ്, അവസരോചിതം എന്നു പറയാതെ വയ്യ...
നട്ടിലെ ചാനലുകളുടേയും റേഡിയോകളുടേയും സ്ഥിരം തട്ടിപിനു ഇര യാവുന്നവർ അഗണ്യമാണ്..

നന്ദി... വീണ്ടും വരാം

ഇരുമ്പുഴിയൻ said...

ഒരു ഉദാഹരണം:

ചാനലുകളുടെ എസ്.എം.എസ് തട്ടിപ്പ്

മലയാളത്തിലെ റീയാലിറ്റി ഷോയുടെ മറവില്‍ ബംഗളൂര് ആസ്ഥാനമായുള്ള ഒരു നിര്മ്മാണ കന്പനിയും ചാനലുകള്ക്കും ദിനം പ്രതി ലക്ഷങ്ങളുടെ വരുമാനം .
നാട്ടുകാര് അറിവില്ലാതെ അയക്കുന്ന എസ്.എംഎസിനു മൊബൈല്‍ കന്പനികള്‍ ഈടാക്കുന്ന പതിനൊന്നു രൂപ വീതിക്കുന്നതിലൂടെയാണത്രേ ഈ വരുമാനം. റീയാലിറ്റി ഷോയില് പങ്കെടുക്കുന്നവര് തന്റെ പ്രകടനത്തിനു ശേഷം പ്രേക്ഷകരോടു തനിക്കു അടുത്ത മത്സരത്തില് എത്താനായി പ്രേക്ഷകരോടു എസ്.എം എസിലൂടെ തനിക്കു വോട്ടു ചെയ്യണമെന്ന് അഭ്യര്ത്ഥിക്കും. ഇങ്ങനെ അയക്കുന്ന എസ്.എം.എസിനു നിലവില് 11 രൂപയാണു മൊബൈല് കന്പനികള് ഈടാക്കുന്നത്. ഈ തുകയുടെ 50 ശതമാനം ഫ്ലാറ്റു കൊടുക്കുമെന്നു പറയുന്ന കന്പനിക്കുള്ളതാണ ്. ബാക്കി 50 ശതമാനം തുക ചാനലും മൊബൈല് കന്പനിയും കൂടി പങ്കു വക്കും. ഓരോ ഷോ കഴിയുന്പോഴും ചാനലിലേക്ക് ആയിരക്കണക്കിനു സന്ദോശങ്ങളാണു അയക്കുന്നത്.

നേരത്തെ റിക്കാര്ഡു ചെയ്തു വച്ചിരിക്കുന്ന പ്രോഗ്രാമിനു പ്രേക്ഷകരുടെ എസ്.എംഎസ് വോട്ടുകള്‍ പരിഗണിക്കുന്നില്ലെന്ന കാര്യവും സന്ദേശമയക്കുന്നവര് ഓര്മ്മിക്കുന്നില്ല.

ഒരു തവണ സന്ദേശമയച്ചു കൈ പൊള്ളിയവര് ഇപ്പോള് പരിപാടി വരുന്പോഴേ മറ്റു ചാനലുകളിലേക്കു മുഹ്ങുന്നുവെന്നാണു കേള്ക്കുന്നത്

http://sify.com/fullstory.php?id=14564349

ബഷീർ said...

> ഇര


താങ്കളുടെ അഭിപ്രായത്തിനും വിവരണങ്ങൾക്കും ലിങ്കിനും വളരെ നന്ദി.


എല്ലാവരും . റെഡിയാവൂ നാളെ ..നാളെയാണ് ഫലപ്രഖ്യാപനം.. അതെ നാലെ യു.എ. ഇ സമയം കാലത്ത് പത്ത് മണി മുതൽ

Anonymous said...

അല്പ സമയത്തിനകം വോട്ടെണ്ണൽ ആരംഭിക്കും


റജി താഴമൺ
എൻ.എസ്. ജ്യോതികുമാർ
എം.സി.എ. നാസർ

എന്നിവർ ഹാജരായിട്ടുണ്ടെന്ന് അറിയുന്നു

സ്വന്തം ലേഹകൻ

ബഷീർ said...

> അനോണി ലേഹകൻ


നന്ദി.. ഈ വിവരങ്ങൾക്ക്

ഞാനും കിട്ടുന്ന വിവരങ്ങൾ പോസ്റ്റ് ചെയ്യാം.

ജിജ സുബ്രഹ്മണ്യൻ said...

ഐഡിയാ സ്റ്റാർ സിംഗർ തുടങ്ങിയപ്പോൾ മുതൽ കേൾക്കുന്നതാ ഈ എസ് എം എസ് തട്ടിപ്പിനെ പറ്റി.എല്ലാവരും പറയാനാഗ്രഹിച്ച ഒരു കാര്യം ബഷീറിക്ക നന്നായി പറഞ്ഞിരിക്കുന്നു.മറ്റെന്നാൾ നമുക്ക് അറിയാല്ലോ !

ബഷീർ said...

പ്രിയരെ,

പെട്ടി പെട്ടി എസ്.എം.എസ്. പെട്ടി
പെട്ടി തുറന്നപ്പോൾ ദിർഹംസ് കിട്ടി.. ഹി ഹി ഹി
എല്ലാ എസ്.എം.എസ്. ഫലങ്ങളും (?) കൂടി ഇവിടെ കൊടുക്കുന്നു.
അനോണി സ്വന്തം ലേഹകന്‍ മെയിലില്‍ അയച്ച് തന്ന് സഹായിച്ചതിന് നന്ദി.

വിജയി(?)കള്‍ താഴെ 1) തിരുവനന്തപുരം

യു.ഡി.എഫ്
ശശി തരൂർ
15 എസ്.എം.എസ് ഭൂരിപക്ഷം


2)ആറ്റിങ്ങൽ

അഡ്വ. സമ്പത്ത് (എൽ.ഡി.എഫ് )
8 എസ്.എം.എസ് ഭൂരിപക്ഷം

3) കൊല്ലം

യു.ഡി.എഫ് ,പീതാംബരക്കുറുപ്പിന്
30 എസ്.എം.എസ്. അധികം

4)മാവേലിക്കര

കൊടിക്കുന്നിൽ സുരേഷ് (യു.ഡി.എഫ് )
105 എസ്.എം.എസ്. ഭൂരിപക്ഷം

5) പത്തനം തിട്ട

യു.ഡി.എഫ്. ആന്റോ ആന്റണിക്ക് 200 എസ്.എം.എസിനു വിജയിച്ചു

6) ആ‍ലപ്പുഴ

കെ.സി വേണു ഗോപാൽ - യു.ഡി.എഫ്.
150 എസ്.എം.എസ്. കൂടുതൽ നേടി

7) കോട്ടയം

ജോസ് കെ.മാണി (യു.ഡി.എഫ് )
ഒരു എസ്.എം.എസിനു ജയിച്ചൂ..

8) ഇടുക്കി

പി.ടി.തോമസും യു.ഡി.എഫ്
ഫ്രാൻസിസ് ജോർജ്ജും എല്‍.ഡി.എഫ്
( ഒപ്പത്തിനൊപ്പം )!!

9) എറണാകുളം

കെ.വി. തോമസ് യു.ഡി.എഫ്.
68 എസ്.എം.എസ്. അധികം

10) ചാലക്കുടി

യു.ഡി.എഫിന്റെ കെ.പി. ധനപാലൻ
80 കൂടുതൽ

11) തൃശൂരിൽ

പി.സി. ചാക്കോ
തൊട്ടടുത്ത ഇടതു പക്ഷ സ്ഥാനാർത്ഥിയേക്കാൾ 80 എസ്.എം.എസ്. അധികം നേടി..

12) ആലത്തൂർ

എന്റെ സ്വന്തം ( വോട്ടില്ലാത്ത) പഴയ ഒറ്റപ്പാലം :
എൽ.ഡി.എഫിലെ പി.കെ ബിജുവിന്
15 കൂടുതൽ

13 ) പാലക്കാട്

യു.ഡി.എഫ് -സതീഷൻ പാച്ചേനി
6 കൂടുതൽ

14) മലപ്പുറം

യു.ഡി.എഫ്. ഇ. അഹമ്മദ് 376 കൂടുതല്‍

15) പൊന്നാനി

യു.ഡി.എഫ് . ഇ.റ്റി മുഹമ്മദ് ബഷീര്‍
450 കൂടുതല്‍

16) കോഴിക്കോട്

യു.ഡി.എഫ്. എം.കെ.രാഗവന്‍ 16 കൂടുതല്‍


17) വയനാട്

കെ.മുരളീധരൻ (എൻ.സി.പി )
2 എസ്.എം.എസ്. കൂടുതൽ
റഹ്മത്തുല്ല മൂന്നാം സ്ഥാനത്താണെന്ന് കേട്ടു.

18) വടകര

യു.ഡി.എഫ്. മുല്ലപ്പള്ളി രാമചന്ദ്രന്‍ 75 കൂടുതല്‍

19) കണ്ണൂര്‍

എല്‍.ഡി.എഫ്. കെ.കെ. രാഗേഷ് 6 കൂടുതല്‍


20) കാസര്‍കോഡ്

എല്‍.ഡി.എഫ്. പി. കരുണാകരന്‍ 45 കൂടുതല്‍
ബി.ജെ.പിയും കോണ്‍ഗസും ഒപ്പത്തിനൊപ്പം

**** ***** ****

അപ്പോ ഈ പരിപാടി കഴിഞ്ഞു.
കഫ്ത്തേരിയക്കാരും ലേബര്‍ ക്യാമ്പില്‍ വസിക്കുന്നവരും ,ഗോസറിക്കാരും വളരെയധികം രാഷ്ടീയ സാക്ഷരത കാത്തു സൂക്ഷിക്കുന്നു എന്നാണത്രെ ഈ എസ്.എം.എസ് തരംഗം സൂചിപ്പിക്കുന്നത് ( മുതിര്‍ന്ന മാധ്യമ പ്രവര്‍ത്തകന്‍ എം.സി.എ നാസര്‍ പറയുന്നു )

ഈ മുതിര്‍ന്ന എന്നതിന് വേറെ വല്ല അര്‍ത്ഥവുമുണ്ടോ എന്തോ ?

കഴിഞ്ഞ നിയമ സഭാ എസ്.എം.എസ്. മത്സര ഫലത്തിൽ നിന്ന് പാഠമുൾകൊണ്ടത് കൊണ്ട് ഇത്തവണ ഒരു മുൻ കൂർ ജാമ്യം റേഡിയോക്കാർ എടുത്തിട്ടുണ്ട്.
ഇന്ന് കാലത്തെ ന്യൂസിൽ തന്നെ പറയുന്നത് കേട്ടു ‘ കേരളത്തിൽ നടന്ന തിരഞ്ഞെടുപ്പുമായി ഈ പ്രതീകാത്മക വോട്ടെടുപ്പിന് (തട്ടിപ്പിന് ) യാതൊരു ബന്ധവുമില്ല ‘ എന്ന്


അപ്പോള്‍ നാളത്തെ കഴിഞ്ഞ് മറ്റന്നാള്‍ കാണാ‍ാം :)


ജയിച്ച പാർട്ടി സിന്ദാബാദ് TOTAL 20

UDF = 14
LDF = 4
NCP -1
EQUAL -1

ബഷീർ said...

ഇത്തവണ ടോട്ടൽ മൊത്തം ആകെ കണക്കനുസരിച്ച്, എസ്.എം.എസ്. ഫലവും തിരഞ്ഞെടുപ്പ് ഫലവും ഏതാണ്ട് ഒത്ത് വന്നതിനാൽ തന്നെ മുൻ കൂർ ജാമ്യം ഉപേക്ഷിച്ച് ..ഞങ്ങൾ അന്നേ പറഞ്ഞില്ലേ എന്ന രീതിയിലായി ഇപ്പോൾ.. അടുത്ത തിരഞെടുപ്പിൽ എസ്.എം.എസ്. വാരിക്കൂട്ടാൻ ഒരു പിടിവള്ളിയായി ..

എസ്.എം.എസ്. അയച്ച് കാശ് കളഞവർക്ക് വീണ്ടും അയക്കാനുള്ള ഒരു ആത്മ(അന്ധ)വിശ്വാസവും..


എന്നാലും, ആ മുരളീധരനെ ഇങ്ങിനെ മോഹിപ്പിച്ച് കൊല്ലേണ്ടിയിരുന്നില്ല. :)

Unknown said...

hi

Mohamedkutty മുഹമ്മദുകുട്ടി said...

അസ്സലായിട്ടുണ്ട് ബഷീര്‍.നമ്മുടെ ജനം കഴുതയായത് കൊണ്ട് മുതലാളിമാരുടെ കീശ വീര്‍ത്തു കൊള്ളും.അല്ലെങ്കില്‍ ഈ റിയാലിറ്റി ഷോകളും എസ്സ്.എമ്മെസ്സും ഇങ്ങനെ ഒരു മാറാ രോഗമായി തുടരുമോ?.പണ്ടൊക്കെ പിച്ചക്കാര്‍ ബസ്സിലും ട്രെയിനിലും മാത്രമേ ഉണ്ടായിരുന്നുള്ളൂ.

ബഷീർ said...

> കാന്താരിക്കുട്ടി

വായനയ്ക്കും അഭിപ്രാ‍യത്തിനു നന്ദി.
ഇതിങ്ങനെ തുടരും.. ഓരോ പേരിൽ !!

> സുരേഷ് എന്ന പേരിൽ വന്ന മുസ്ലിം ലീഗ് സുഹൃത്തേ,

ആദ്യത്തെ hi ക്ക് ഒരു hello..

പിന്നത്തെ കമന്റ് ഞാൻ ഡിലിറ്റ് ചെയ്യുന്നു. ഈ പോസ്റ്റുമായി ബന്ധമില്ലാത്തതിനാൽ


> മുഹമ്മദ് കുട്ടി,

>> പണ്ടൊക്കെ പിച്ചക്കാര്‍ ബസ്സിലും ട്രെയിനിലും മാത്രമേ ഉണ്ടായിരുന്നുള്ളൂ. <

ഹ ..ഹ. അത് കലക്കി...

ഇപ്പോൾ ഫ്ലൈറ്റിലും പിച്ചക്കാരോ(എമ്പാർക്കേഷൻ കാർഡി പൂരിപ്പിക്കാനായി കൊടുത്തപ്പോൾ ആരോ ചോദിച്ചതാണത്രെ...!)


അഭിപ്രായം അറിയിച്ചതിൽ സന്തോഷം !

ബഷീർ said...

suresh..

നിങ്ങൾ വീണ്ടും കമന്റിയത് ഞാൻ ഒരിക്കൽ കൂടി ഡിലിറ്റ് ചെയ്ത്. ഇത് അവസാനിപ്പിക്കാം ഇവിടെ

കുരുത്തം കെട്ടവന്‍ said...

എന്താണാവോ എം സി എ നാസരിനോട് ഇത്ര അസഹിഷ്ണുധ? സിരാജിന്റെ ലേഖകന്‍ അല്ലാഞ്ഞിട്ടാണോ?

ബഷീർ said...

ഒരിക്കലുമല്ല സുഹൃത്തെ,


ഇത്തരം കോമാളി പരിപാടികൾക്ക് എം.സി.എ. നാസറിനെ പോലെയുള്ള ഒരു അറിയപ്പെടുന്ന മാധ്യമപ്രവർത്തകന്റെ സാന്നിദ്ധ്യവും ആ പരിപാടിയിൽ പങ്കെടുത്ത് കാശ് കളഞ്ഞവർ രാഷ്ട്രീയ സാക്ഷരതകൊണ്ടാണ് അത് ചെയ്തത് എന്ന് വിളിച്ച് പറയുമ്പോൾ അതപ്പടി വിഴുങ്ങാൻ മാത്രം വിവരമില്ലേന്ന് കൂട്ടിക്കോളൂ...

നന്ദി വന്നതിൽ അഭിപ്രായം അറിയിച്ചതിൽ

Jikkumon - Thattukadablog.com said...

hi hi hi

Related Posts with Thumbnails