Wednesday, April 23, 2008

സായ്പ്പ്‌, അറബി & മലയാളി

എല്ലാവരും ഉറങ്ങിയിരിക്കുന്നു.. എനിയ്ക്ക്‌ ഉറക്കം വരുന്നില്ല.. കട്ടിലില്‍ നിന്നെഴുന്നേറ്റ്‌ മേശപ്പുറത്ത്‌ വെച്ചിരുന്ന വെള്ളത്തിന്റെ ബോട്ടില്‍ നോക്കി.. അത്‌ അവിടെ തന്നെയുണ്ട്‌.. പക്ഷെ ഒരു തുള്ളി വെള്ളമില്ല.. ബോട്ടിലുമെടുത്ത്‌ ഉറങ്ങുന്നവരെ ഉണര്‍ത്താതെ മെല്ലെ അടുക്കളയില്‍ ചെന്ന് വെള്ളത്തിന്റെ ബോട്ടിലില്‍ നിന്ന് വെള്ള മെടുത്ത്‌ കുടിച്ചു.. ബാല്‍ക്കണിയില്‍ പോയി ഒന്നു പുറം കാഴ്ച കാണാമെന്ന് ഒരു ഉള്‍വിളി.. പുറത്തേക്ക്‌ നോക്കിയപ്പോള്‍ കണ്ട കാഴ്ച..

ഞാന്‍ ഉറങ്ങാന്‍ കിടക്കുന്നത്‌ വരെ വാഹനങ്ങള്‍ ചീറിപ്പാഞ്ഞു പോയിരുന്ന റോഡ്‌ കാണുന്നില്ല.. സര്‍വ്വത്ര വെള്ളം.. നെഞ്ചില്‍ ഒരു ഇടിമിന്നല്‍.. എല്ലാം ഇവിടെ അവസാനിക്കുകയാണോ ? എന്താണു സംഭവിച്ചതെന്ന് അറിയാനുള്ള ആകാംക്ഷയില്‍ സൂക്ഷിച്ച്‌ നോക്കി.. തെളിഞ്ഞു കത്തുന്ന സ്റ്റ്രീറ്റ്‌ ലൈറ്റിന്റെ വെളിച്ചത്തില്‍ ഒരു ചെറിയ വഞ്ചി ഞങ്ങളുടെ ബില്‍ഡിംഗിന്റെ അരികിലായി നിറുത്തിയിട്ടിരിക്കുന്നത്‌ കണ്ടു.. ആരുടെയൊക്കെയൊ സംസാരം കേള്‍ക്കാനുണ്ട്‌.. ഞാന്‍ ബാല്‍ക്കണിയുടെ അറ്റത്ത്‌ നിന്ന് ശ്രദ്ധിച്ചു.. വഞ്ചിയില്‍ മൂന്ന് പേരുണ്ട്‌.. ഒരാള്‍ സൂട്ടും കോട്ടും ടൈയുമൊക്കെ ധരിച്ച്‌ ഒരു ജോര്‍ജ്‌ ബുഷ്‌ സ്റ്റൈല്‍, മറ്റൊരാള്‍ ഒരു ലുങ്കിയും ഷര്‍ട്ടും അണിഞ്ഞ മല്ലു സ്റ്റൈല്‍, മൂന്നാമത്തെയാള്‍ അറബി വേഷത്തിലുമാണ്‌. എന്തോ കാര്യമായ ചര്‍ച്ചയാണെന്ന് തോന്നിയത്‌ കൊണ്ട്‌ എന്താണിവര്‍ പറയുന്നതെന്ന് കേള്‍ക്കാന്‍ കാത്‌ കൂര്‍പ്പിച്ചു.

തങ്ങളുടെ നാട്ടിന്റെ കേമത്തരങ്ങളാണു എല്ലാവരും പറയുന്നത്‌.. ആനയുണ്ട്‌ , മയിലുണ്ട്‌, ഒട്ടകമുണ്ട്‌.. ആനമയിലൊട്ടകണ്ട്‌.. എന്നിങ്ങനെ ഒോരോരുത്തരും കത്തിച്ചു വിടുന്നുണ്ട്‌.. പെട്ടെന്ന് നമ്മുടെ സായ്പ്പ്‌ തന്റെ ബാഗ്‌ തുറന്ന് ഒരു ലാപ്റ്റോപ്‌ കമ്പ്യൂട്ടര്‍ എടുത്ത്‌ വെള്ളത്തിലേക്കിട്ടു.. മറ്റുള്ളവര്‍ അത്ഭുതത്തോടെ നോക്കിയിരുന്നു.. സായ്പ്പ്‌ പറയുകയാണു... ഡോണ്ട്‌ വറി.. ഞങ്ങള്‍ ഒരു ആഴ്ചയേ ഇത്‌ ഉപയോഗിക്കാറുള്ളൂ .. പിന്നെ പുതിയത്‌ വാങ്ങാറാണു പതിവ്‌... ഉടനെ തന്നെ ലുങ്കി മല്ലു തന്റെ ബാഗില്‍ നിന്ന് നാലഞ്ചു തേങ്ങ യെടുത്ത്‌ ആ വെള്ളത്തിലെക്ക്‌ ബ്ലും ബ്ലും ... എന്നിട്ട്‌ സായ്പ്പിനോടും അറബിയോടുമായി പറഞ്ഞു.. ഇത്‌ ഞങ്ങളുടെ നാട്ടില്‍ കുറേയധികമുണ്ട്‌.. ഞങ്ങള്‍ക്കിതിനു യാതൊരു വിലയുമില്ല.. വിലയും കിട്ടുന്നുമില്ല അത്‌ കൊണ്ട്‌ കുറച്ച്‌ ഈ വെള്ളത്തില്‍ കിടന്ന് മുളച്ച്‌ വളരട്ടെ ...ഉപകാരമാവും..അറബി എന്തു ചെയ്യുമെന്ന് കാണാന്‍ ആകാംക്ഷയായി.. ഈത്തപ്പഴമോ , ഒട്ടകപ്പാലോ എടുത്ത്‌ കളയുമെന്ന് കരുതി ഇരുന്ന ഞാന്‍ കണ്ട കാഴ്ച.. അറബി നമ്മുടെ മലയാളിയെ പൊക്കിയെടുത്ത്‌ വെള്ളത്തിലെക്ക്‌ ഇടുന്നതാണു.. അന്തം വിട്ട സായ്പ്പിനോട്‌ .. മാഫി മുഷ്കില്‍ .. ഇത്‌ പോലുള്ളത്‌ ഞങ്ങടെ നാട്ടില്‍ ഒരുപാടുണ്ട്‌.. തേരാ പാര (അറബിയില്‍ അല്‍ തേരാ വല്‍ പാരാ എന്നു പറയും ) എന്ന് പറഞ്ഞ്‌ അറബി ഒന്നും സംഭവിക്കാത്ത മട്ടില്‍ സുലൈമാനി കുടിയ്ക്കാന്‍ ആരംഭിച്ചു.

ഞെട്ടി പുറകോട്ട്‌ മാറിയ എന്റെ തല കട്ടിലിലിന്റെ അടുത്ത്‌ ഇട്ടിട്ടുള്ള മേശയില്‍ ഇടിച്ചു.. എന്റുമ്മാ.. അറിയാതെ വിളിച്ചുപോയി.. ഹെന്താണ്ടാ.. പറ്റീത്‌ ? ഹമീദ്ക്കയാണു ..അടുത്ത കട്ടിലില്‍ നിന്ന്.. ഹേയ്‌.. ഒന്നൂല്ല്യ.. ഞാന്‍ പതുക്കെ പുതപ്പിനുള്ളിലേക്ക്‌ വലിഞ്ഞു.... പാവം മലയാളിയുടെ കാര്യമായിരുന്നു എന്റ്‌ തല വേദനിച്ചതിനെക്കാള്‍ എന്റെ ചിന്തയില്‍ തേങ്ങാക്കുലപോലെ തൂങ്ങി നിന്നത്‌..

ഇത്രയും സഹിച്ചതിനു നന്ദി..കട /കഥപ്പാട്‌ : കെ.കെ.എം.എസ്

12 comments:

ബഷീർ said...

പാവം മലയാളിയുടെ കാര്യമായിരുന്നു എന്റ്‌ തല വേദനിച്ചതിനെക്കാള്‍ എന്റെ ചിന്തയില്‍ തേങ്ങാക്കുലപോലെ തൂങ്ങി നിന്നത്‌..

കാസിം തങ്ങള്‍ said...

ബഷീര്‍ക്കാ, സ്വപ്നമാണെങ്കിലും സംഗതി യാതാര്‍ത്ഥ്യം തന്നെ. ലോകത്തെവിടെയും മലയാളിയെ തടഞ്ഞിട്ട് നടക്കാന്‍ പറ്റാത്ത അവസ്ഥയാണല്ലോ.പാരപ്പണിയിലും പറ്റിക്കല്‍സിലും മലയാളിയെ വെല്ലാന്‍ ആരുമില്ലല്ലോ.

Unknown said...

ബഷീര്‍ എന്നു കേട്ടതേ ചാടിവീണു....
ഒത്തിരി പ്രതീക്ഷിച്ചു,,, ഇത്തിരി കിട്ടി,,, സന്തോഷായി ഇക്കാ...

ബഷീർ said...

>>തങ്ങളെ..

ശരിയാണു.. മലയാളികള്‍ ആ കാര്യത്തില്‍ എല്ലാവരെക്കാളും മുന്നില്‍ തന്നെ വരുന്നുണ്ട്‌.. നൂതന രീതികളല്ലേ മല്ലൂസ്‌ ആവിഷ്കരിക്കുന്നത്‌.. ഇപ്പോള്‍ റിയല്‍ എസ്റ്റേറ്റ്‌ എന്ന പേരില്‍ റിയല്‍ തട്ടിപ്പ്‌ പൊടിപൊടിക്കുന്നുണ്ട്‌.. പഴയ ആട്‌ തേക്ക്‌ മാഞ്ചിയം പുതിയ രൂപത്തില്‍.. കാത്തിരുന്നുകാണാം

>>മുരളീ ക്യഷ്ണ..

മനസ്സിലായി മനസ്സിലായി..
ഇത്തിരി തരാനേ ഈ ബഷീറിനു കഴിയുകയുള്ളൂ.. പിന്നെ നാട്ടിലായിരുന്നെങ്കില്‍ നല്ല പത്തിരി ഉണ്ടാക്കി തരാമായിരുന്നു...

ശ്രീ said...

നല്ല സ്വപ്നം തന്നെ, ബഷീര്‍ക്കാ.

പത്തിരിയുടെ കാര്യം പറയുന്ന കേട്ടല്ലോ... ;)

കുഞ്ഞന്‍ said...

ബാക്കികൂടി പറയട്ടേ ബഷീര്‍ഭായ്,

വെള്ളത്തില്‍ വീണ മല്ലൂ, സായിപ്പ് വലിച്ചെറിഞ്ഞ ആ ലാപ്ടോപ്പും കൊണ്ടു പൊങ്ങിവന്ന് ആ വഞ്ചി മറച്ചിട്ടു. പാവം നീന്തലറിയാത്ത കവാത്തു മറന്ന സായിപ്പും കാട്ടറബിയും സ്വീവേജ് വെള്ളം ഒഴുകിപ്പോകുന്ന കാനയിലൂടെ ഒഴുകിയൊഴുകിപ്പോയ്..മല്ലുവിനോടു കളിച്ചാല്‍...

തറവാടി said...

വിമാനത്തിലെ ഒരു യാത്രയായി ഈ കഥ കേട്ടിട്ടുണ്ട് :)

Areekkodan | അരീക്കോടന്‍ said...

നല്ല സ്വപ്നം ......

ബഷീർ said...

>ശ്രീ..
കേട്ടു അല്ലേ... ഡോണ്ട്‌ വറി ( വെറി പിടിക്കരുത്‌ )
വഴിയുണ്ടാക്കാം..

>കുഞ്ഞന്‍..
ഹി.. ഹി.. അത്‌ കലക്കി..
ഒപ്പ്‌ വെച്ചിരിക്കുന്നു..

>തറവാടി,
ഫ്ലൈറ്റിനു ടിക്കറ്റ്‌ കിട്ടിയില്ല.. അതാ.. വഞ്ചിയിലാക്കിയത്‌..

>അരീക്കോടന്‍..
എന്റെ തല ഇടിച്ചതിനാലാണോ .. നല്ല സ്വപനം എന്ന് പറഞ്ഞത്‌ !!

കുറ്റ്യാടിക്കാരന്‍|Suhair said...

പഴയ പത്തിരി പുതിയ പ്ലേറ്റില്‍...

ഫസല്‍ ബിനാലി.. said...

ഇത് ഒത്തിരി കേട്ടിട്ടുള്ള കോമഡിയാണല്ലോ ബഷീര്‍ഭായ്..
അടുത്ത ബഷീര്‍ഭായുടെ പോസ്റ്റ് ഞാന്‍ ഊഹിക്കുന്നു, ഒരു വയസ്സന്‍ ഹോട്ടലാണെന്ന് കരുതി ബാര്‍ബര്‍ഷാപ്പില്‍ കയറിയ കഥ..

ബഷീർ said...

>>കുറ്റ്യാടിക്കാരാ..
അതെ ,പുതിയ പ്ലെറ്റ്‌ ഞാനുണ്ടാക്കിയത്‌..മനസ്സിലായല്ലോ..


>>ഫസലേ...
ഇത്‌ കോമഡിയല്ല...ട്രാജഡിയാ..
അതെങ്ങിനെ മനസ്സിലായി... ഇനി അത്‌ വേണ്ട.. വേറെ നോക്കട്ടെ...

കമന്റുകള്‍ക്ക്‌ നന്ദി. വീണ്ടും വരിക..

Related Posts with Thumbnails