ചില അഡ്ജസ്റ്റ്മെന്റുൾ !

ഉമ്മാ..  നേരം കൊറെയായി...  നമുക്ക് പോവ്വാമ്മാ…

മോനേ.. പാപ്പ ഇപ്പോ വരും.. വന്നാലുടനെ നമുക്ക് പോകാം..

പാപ്പ  ഈ നേരത്ത് എങ്ങോട്ടാ പോയത്..പാപ്പാക്കറിയില്ലേ ..ഓട്ടോറിക്ഷ ഇപ്പ വരും. നമുക്ക് ഫോട്ടട്ക്കാൻ  പോണന്ന്..

സ്കൂളിലെ വെക്കേഷൻ വർകിന്റെ ഭാഗമായി ഫാമിലി ഫോട്ടോ വേണം…എന്നാൽ ഒരു അപ്ഡേറ്റഡ് ഫാമിലി ഫോട്ടോ സ്റ്റുഡിയോയിൽ പോയി തന്നെ എടുത്ത് കൊടുക്കാമെന്ന് കരുതി അനിയൻ..  സ്റ്റുഡിയോയിൽ  പോകാൻ ഓട്ടോറിക്ഷ ഏർപ്പാടാക്കിയ സമയത്ത് അനിയന് ഒന്ന് പുറത്ത് പോവേണ്ടി വന്നു. അനിയന്റെ മകന് ഇരിക്കപൊറുതിയില്ല..അവൻ ഉമ്മാനെ തിരക്ക് കൂട്ടുകയാണ്..   ഇതിനിടയ്ക്ക് ഓട്ടോ റിക്ഷയും എത്തി.. അനിയൻ  പക്ഷെ തിരിച്ചെത്തിയിട്ടില്ല..

ഉമ്മാ.. ഓട്ടോർക്ഷ വന്ന്ണ്ട്.. നമുക്ക് പോകാം..

ടാ.. പാപ്പ വരണ്ടേ.. നമുക്ക്  ഫാമിലി ഫോട്ടോ എടുക്കണ്ടേ.. ?

അതിനു പാപ്പ എവിടെ..? ഉമ്മാ ..ഉമ്മാ..നമുക്കൊരു കാര്യം ചെയ്യാം.

എന്ത് കാര്യമാ..?

പാപ്പ വരണത് കാണുന്നില്ല.   നമുക്ക് തത്കാലം ഓട്ടോറ്ക്ഷ മാമാനെ കൂട്ടി ഫോട്ടട്ത്ത്  അഡ്ജസ്റ്റ് ചെയ്യാം… മിസ്സിന് നമ്മടെ പാപ്പാനെ അറിയൂല്ലല്ലോ..  വെക്കേഷൻ വർക്ക് തിരിച്ച് തരുമ്പോൾ  ആ ഫോട്ടോ നമുക്ക് മാറ്റിയൊട്ടിക്കാം.. !

ടാ…….!!??

വാൽ നുറുങ്ങ് :

പ്രവാസികൾക്കൊപ്പം അവരുടെ കുടുംബങ്ങളും  അഡ്ജസ്റ്റ് ചെയ്ത് ജീവിക്കാൻ പഠിക്കണം. ഗവണ്മെന്റ് എന്തെങ്കിലും ചെയ്യുമെന്ന് കരുതി കാത്തിരിക്കരുത്.. ഉള്ള കാലത്ത് എന്തെങ്കിലും ‘മിച്ചം’ വെച്ചാൽ  ഇല്ലാത്ത കാലത്ത് ‘പിച്ച’യെടുക്കേണ്ടി വരില്ല

ടെന്‍ഷന്‍ മാറിയ വഴി !

തോര്‍ത്ത് മുണ്ടില്‍, കൈകളില്‍, തലയിണകളില്‍.. എവിടെയൊക്കെ സ്പര്ശനമേല്‍ക്കുന്നുവോ അവിടെയെല്ലാം സുലഭമായി കണ്ടിരുന്നതാണ്‌.. കൂടുതല്‍ കാണുമ്പോള്‍ കൂടുതല്‍ ടെന്‍ഷന്‍... കാച്ചിയതും കാച്ചാത്തതുമായ വെളിച്ചെണ്ണകള്‍..ഒറ്റമൂലികള്‍ .. ... *ഗള്‍ഫ് ഗേറ്റ് വരെയെത്തിയതാണ്‌ ചിന്തകള്‍ . ആയിടക്കാണാ മരുന്നിന്റെ പരസ്യം ശ്രദ്ധയില്പെട്ടത്. ഒട്ടും പ്രതീക്ഷയില്ലായിരുന്നു.. എങ്കിലും ഭ്യാര്യയുടെ നിര്‍ബന്ധത്തിനു അയാള്‍ വഴങ്ങി..

ഇപ്പോള്‍ തോര്‍ത്തു മുണ്ടില്‍, കൈകളില്‍ ‍ ..എന്തിന്‌ ഉറങ്ങി ഉരുണ്ടാലും തലയിണയില്‍ പോലും പേരിനു ഒരെണ്ണം കാണാന്‍ കഴിയില്ല.. അയാള്‍ കുളിക്കുന്നു. .തോര്‍ത്തുന്നു. ഉറങ്ങിയെഴുന്നേല്‍ക്കുന്നു.. ഒട്ടുമില്ല ടെന്‍ഷന്‍ .. !

കൊഴിയാനായി ഒറ്റ മുടിയുമില്ല !!


*ഹെയര്‍ ഫിക്സിംഗ് സ്ഥാപനം

11-11-11 ന്റെ വിവാഹത്തിനു ആശംസകൾ

ഇന്ന് 11-11-11  ഈ ദിവസം നാട്ടിലുണ്ടാ‍വുമെന്ന് കരുതി  ഒരുപാട് ഒരു പാട്  ഇല്ലെങ്കിലും കുറച്ചൊക്കെ സ്വപനങ്ങൾ മനസിലെ ബിഗ് സ്ക്രീനിൽ കണ്ടിരുന്നതാണ്.. ഒരു വെടിക്ക് മൂന്ന് പക്ഷി എന്നതായിരുന്നു ലക്ഷ്യം...   അഥവാ ഒക്റ്റോബർ 25 നു നാട്ടിലെത്തി നവംബർ 13 നു തിരിച്ചു വരുന്ന അവധി ഷെഡ്യൂളിൽ ബലി പെരുന്നാളിനു കുടുംബത്തോടൊപ്പം ചേരുക..  നവംബർ 7 നു എന്റെയും എന്റെ ബീവിയുടെയും  സ്വന്തം പതിനഞ്ചാമത് വിവാഹ വാർഷികം ഒരുമിച്ച് ആഘോഷിക്കുക. അത് കഴിഞ്ഞ് 11-11-11 ന്റെ നിക്കാഹിലും സത്കാരത്തിലും പങ്ക് കൊണ്ട് വധൂ വരന്മാരെ അനുഗ്രഹിക്കുക ( കാര്യമായിട്ടാ) എന്നതൊക്കെയായിരുന്നു വെടിയേൽക്കാതെ  രക്ഷപ്പെട്ട ആ മൂന്ന് പക്ഷികൾ..   ആദ്യപടിയായി ലീവ് ഒ.കെ യായി വരുകയായിരുന്നു. അതിനിടയ്ക്ക് മറ്റൊരാൾ മുന്നെ കൊടുത്ത ലീവ് എന്റെ ലീവുമായി ഉടക്കി..എന്റെത് പിന്തള്ളപ്പെട്ടു മാത്രമല്ല മൂന്ന് പക്ഷിക്ക് പകരം  മൂന്ന് വെടിയാണ് തിരിച്ച് കിട്ടിയത്.. ഒന്ന് ലീവ് കാൻസൽ, രണ്ട് ലീവിനു പോകുന്ന സെക്രട്ടറിക്ക് പകരമായി ചൂടൻ ബോസുമായി ഒറ്റയ്ക്ക് ജോലിചെയ്യണം എന്ന ഓർഡർ, മൂന്നാമത്തേത് ഒരു ഭീഷണിയാണ്  ..  അത് തത്‌കാ‍ലം സീ‍ക്രട്ടായിരിക്കട്ടെ :)   അങ്ങിനെ ഒരു വെടിക്ക് മൂന്ന് പക്ഷി സ്വപ്നം കണ്ട എനീക്ക് കിട്ടിയ മൂന്ന് വെടിയുമേറ്റ് പ്രവാസിയുടെ സ്ഥിരം പ്രയാസവുമായി   ബലിപെരുന്നാൾ ബോറടിച്ച് കടന്ന് പോയി..വിവാഹ വാർഷികം.. ഓർമ്മകളേ..  വിരഹ ഗാനം പാടി നടന്നു പോയി.. ഇപ്പോഴിതാ 11-11-11 ന്റെ നിക്കാഹ്  ..പ്രിയ ജേഷ്ഠൻ മാലപ്പാടക്കം ബ്ലോഗർ    സിദ്ധീഖ് തൊഴിയൂരിന്റെ പ്രിയ മകൾ നസ്‌നി അഥവാ നമ്മുടെ (ചിപ്പീ) നേന മോളൂടെ താത്താടെ നിക്കാഹ് കടന്നു വന്നു..  അതിതാ ഇന്ന് നടക്കുന്നു.   സിദ്ധിഖാനെ വിളിച്ചു ശൈലാത്താനെ വിളിച്ചു എന്റെ ബീവിയെ വിളിച്ചു  എല്ലാരെയും വിളിച്ചു അവരെല്ലാം സന്തോഷത്തിലാണ് (ഒരു പിതാവിന്റെ ഉത്കണ്ഢയും മറ്റും സിദ്ധീഖിന്റെ സംസാരത്തിലുണ്ടെങ്കിലും )  ..

എന്നെപ്പോലെ തന്നെ വിവാഹ നാളിൽ നാട്ടിലെത്താൻ കരുതി സാധിക്കാതെ  സിദ്ധിഖിന്റെ സ്വന്തം ജേഷ്ഠൻ മോമ്മാലിക്ക (മുഹമ്മദലി) യും അബുദാബിയിലുണ്ട്..   മോമ്മാലിക്കാടെ മകളുടെ വിവാഹം കഴിഞ്ഞ മാസമായിരുന്നു. അതിൽ പങ്കെടുത്ത് തിരിച്ച് വന്നതായിരുന്നു.. വീണ്ടുമൊരുയാത്രയ്ക്ക് നിർവാഹമില്ലാതെയായി.... 

നസ്‌നിമോളെ നിക്കാഹ് ചെയ്യുന്നത് അലി മാണിക്കത്ത്  (തൊഴിയൂർ )അത്യാവശ്യം എഴുതുന്ന ആളാണ്..കൂടുതൽ പരിചയപ്പെടാൻ കഴിഞ്ഞിട്ടില്ല.  എന്നാലും വധുവിന്റെ  കുഞ്ഞുപ്പ എന്ന നിലയിൽ ചില ഉപദേശങ്ങാളൊക്ക് നൽകിയിട്ടുണ്ട്... ( ഭാഗ്യവാനായ വരൻ )  ബാക്കി പിന്നെ.. ഇൻശാ അല്ലാഹ്..


സാധാരണ നിലയിൽ അടുത്തകാലത്ത് വെള്ളിയാഴ്ചകളിൽ മുസ്‌ലിം വിവാഹം നടത്താറില്ല മുൻ‌കാലങ്ങളിൽ പതിവായിരുന്നെങ്കിലും..  എന്നാൽ വരൻ അലിയുടെ പ്രത്യേക താത്പര്യമാണ് നൂറ്റാണ്ടിലെ അപൂർവ്വ ദിനമായ 11-11-11 നു തന്നെ നിക്കാഹ് നടത്തണമെന്നത്..  അത് ഇതാ പൂവണിയുന്നു..    ഈ സുദിനത്തിൽ ഒരുമിച്ച് ചേരാൻ  കഴിയാത്തതിൽ ഏറെ ദു:ഖമുണ്ടെങ്കിലൂം എല്ലാം പതിവുപോലെ ഉള്ളീലൊതുക്കി ഈ ഊഷരഭൂവിൽ നിന്നും ഊഷ്മളമായ വിവാഹ മംഗളാശംസകൾ നേരുന്നു.. പ്രിയ മകൾ നസ്‌നിക്കും മരുമകൻ അലി മാണിക്കത്തിനും..    പ്രിയപ്പെട്ടവരേ.. നിങ്ങളും നേരുമല്ലോ ആശംസകൾ



ഈ  പോസ്റ്റ് 11-11-11 നു 11-11 നു പോസ്റ്റ് ചെയ്യുന്നു..  :)